Вадефул Г20 саммитига таклифни Путин учун синов деб атади
Германия ташқи ишлар вазири Ёҳанн Вадефул Россия президенти Владимир Путиннинг Г20 саммитидаги эҳтимолий иштироки Кремлнинг Украинадаги урушни тугатиш бўйича жиддий музокараларга қанчалик тайёрлигини кўрсатишини билдирди. Унинг таъкидлашича, бундай тайёрликнинг амалий белгиси Украинада ўт очишнинг тўхтатилиши бўлади.
Вадефул Путин учун Г20 саммитига таклифни синов деб атади
ДВ хабарига кўра, Вадефул бу ҳақда 25-сентабр, жума куни Оттавада Канада ташқи ишлар вазири Анита Ананд билан учрашувда айтган. У АҚШнинг Путинни декабрда бўлиб ўтадиган Г20 саммитига таклиф қилишини Россия раҳбари учун алоҳида синов деб баҳолади.
Германия ташқи ишлар вазири Берлин ва Украинанинг Ғарбдаги бошқа иттифоқчилари Россия ҳукуматини, жумладан, шахсан Путинни бир неча бор музокаралар столига чорлаганини эслатди. Унинг сўзларига кўра, Россиянинг аниқ натижага йўналтирилган музокараларга тайёрлигини Украинада ўт очишни тўхтатиш орқали баҳолаш мумкин.
Путин ҳарбий ҳаракатларни давом эттирса, Г20 саммитини бойкот қилиш керакми, деган саволга жавобан Вадефул Россиянинг тадбирдаги иштироки ҳозирча фақат эҳтимол эканини таъкидлади. У яқин ҳафталарда вазият қандай ривожланишини кутишга чақирди.
«Россия музокара олиб бориши керак - қанча эрта бўлса, шунча яхши», - деди Германия ташқи ишлар вазири.
Канада ташқи ишлар вазири Анита Ананд ҳам Путиннинг саммитдаги эҳтимолий иштироки бойкот учун асос бўлмаслигини билдирди. Унинг айтишича, дипломатия музокаралар столида қолишни ва мураккаб масалалар юзасидан мулоқотни давом эттиришни талаб қилади.
Аввалроқ АҚШ давлат котиби Марко Рубио Путин декабрда Маямида ўтказиладиган Г20 саммитига таклиф қилинганини маълум қилган эди. Рубионинг таъкидлашича, бу ташриф Россия президентига АҚШ президенти Доналд Трамп, шунингдек, бошқа давлат ва ҳукумат раҳбарлари билан музокаралар ўтказиш имконини бериши мумкин. Кремл ҳозирча таклифга қандай жавоб беришини белгиламаган.
Айни пайтда, Тҳе Вашингтон Пост газетасига кўра, АҚШ Конгресси Сенатининг ҳар икки партияга мансуб 14 аъзоси Трампни Путинга юборилган таклифни қайтариб олишга чақирган.
Республикачилар ва демократлар Оқ уй раҳбарига йўллаган мурожаатида Россиянинг Украинага қарши кенг кўламли уруш бошлаши учун Путин шахсан жавобгар эканини таъкидлаган. Улар Украинадаги фуқаролик обьектларига зарбалар давом этаётган бир пайтда Россия раҳбарининг АҚШдаги саммитда иштирок этиши Россия ҳокимиятига халқаро мақбуллик бериш ва у билан муносабатларни одатий ҳолга қайтариш хавфини туғдиришини билдирган.
Сенаторлар Путин ва Россия делегациясининг бошқа вакиллари Вашингтон АҚШ миллий хавфсизлигига таҳдид деб баҳолайдиган ҳаракатлари учун Америка санксиялари остида эканини ҳам эслатган.