Узунлиги 220 метр, вазни 3 500 тонна: Хитой туннел қазувчи улкан машина яратди
Хитойда қазиш диаметри бўйича дунёдаги энг йирик икки қалқонли туннел қазиш машинаси ишлаб чиқарилди. Юехи номли 3 500 тоннали комплекс Сичуан провинсиясида 18,4 километрлик автомобил туннелини қуришда қўлланади.
Узунлиги 220 метр, вазни 3 500 тонна: Хитой туннел қазувчи улкан машина яратди
Машина сентабр охирида Сичуан провинсиясининг маъмурий маркази бўлган Ченду шаҳрида ишлаб чиқариш линиясидан чиқарилди. Унинг умумий узунлиги 220 метр, қазиш диаметри эса 13,01 метрни ташкил этади.
Юехиъни Шудао Инвестмент Гроуп инфратузилма компанияси ҳамда туннел қазиш техникаларини ишлаб чиқарувчи Чина Раилвай Энгинееринг Эқуипмент Гроуп биргаликда ишлаб чиқди. Бу рекорд барча туннел қазиш машиналарига эмас, айнан икки қалқонли комплекслар тоифасига тегишли.
Бундай машиналар айланувчи кесиш диски ёрдамида тоғ жинсларини майдалаб, туннел очади. Икки қалқонли конструксия турли геологик шароитларда, жумладан, мустаҳкам ва дарз кетган жинсларда ишлашга мослаштирилган.
Юехиънинг олд қисмида ҳар бирининг диаметри қарийб 48 сантиметр бўлган 83 та дискли кескич ўрнатилган. Улар тоғ жинсларини майдалайди, гидравлик тизим эса машинани олдинга силжитади.
Комплекс бир вақтнинг ўзида бир нечта вазифани бажариши мумкин: жинсларни қазиш, туннел деворларига йиғма темир-бетон қисмларни ўрнатиш, атрофдаги жинсларни мустаҳкамлаш ва қазилган материални ташқарига чиқариш.
Машина бурғилаш ва геологик разведка тизимлари билан ҳам жиҳозланган. Улар олдиндаги жинслар ҳолатини комплекс ўша нуқтага етиб бормасидан аввал баҳолаш имконини беради. Автоматик лазерли йўналтириш тизими эса қазиш йўналишини юқори аниқликда сақлашга хизмат қилади.
Юехи Сичуан провинсиясидаги Сзинкоухе - Сичан тезюрар автомобил йўлининг Юеси туннели қурилишида ишлатилади. У ойига 380 метрдан ортиқ масофани қазиб ўтиши мумкинлиги билдирилмоқда.
Ушбу усул фақат бурғилаш ва портлатишга асосланган анъанавий қурилишга нисбатан уч–беш баробар самарали бўлиши кутилмоқда.
Лойиҳа Хитойда йирик диаметрли икки қалқонли машинанинг автомобил туннели асосий қисмини қазишда илк бор қўлланиши бўлади. Илгари бундай комплекслар кўпроқ темирйўл ва метро туннеллари қурилишида ишлатилган.