Uzum Market тизимидаги узилиш Yandex Cloud’даги йирик авария билан бир вақтга тўғри келди

Uzum Market ишидаги узилиш Yandex Cloud’даги йирик авария билан бир вақтга тўғри келди

8 октябрга ўтар кечаси Uzum Market ишида кенг кўламли техник узилиш юз берди. Деярли бир вақтнинг ўзида Yandex Cloud ўз булутли платформасининг мавжудлик зоналаридан бирида электр таъминотида узилишлар бўлганини маълум қилди.

Uzum техник муаммолар сотувчиларнинг шахсий кабинети, буюртмаларни топшириш пунктлари ва омбор тизимларига таъсир қилганини билдирди. Омборларда ва буюртмаларни қабул қилиш пунктларида товарларни қабул қилиш, шунингдек, қайтариб берилган маҳсулотларни топшириш вақтинча тўхтатилди. Компания ҳамкорлардан ҳозирча омборларга келмасликни сўради ва қабул қилинмаган барча етказиб беришларни ҳеч қандай жарималарсиз бошқа таймслотларга кўчириш мумкинлигини маълум қилди.

Uzum жамоаси муаммодан хабардор эканлигини ва уни бартараф этиш устида ишлаётганини маълум қилди. Компания кейинги янгиланишлар ҳақида алоҳида хабар беришга ваъда берди.

Шу билан бирга, Yandex Cloud ru-central1-b мавжудлик зонасида электр таъминоти бузилганини қайд этди. Бунинг оқибатида булутли сервисларнинг бир қисмидан фойдаланиш имконияти йўқолди. Кейинчалик компания юкламани бошқа зоналарга ўтказганини, бироқ ru-central1-b зонасининг ўзи барибир ишламай қолганини ва янги ресурслар яратиш чекланган бўлиши мумкинлигини маълум қилди.

Параллел равишда, "Яндекс"нинг маълумотлар маркази (дата-маркази) жойлашган Рязань вилоятининг Сасово шаҳрида ёнғин содир бўлгани ҳақида хабарлар пайдо бўлди. Россия ОАВларининг маълумотларига кўра, ёнғинга дронлар ҳужуми сабаб бўлган.

"Яндекс"нинг ўзи ушбу шаҳарда ўз маълумотлар маркази борлигини тасдиқлайди ва унинг серверларида, жумладан, Yandex Cloud мижозлари ҳам ишлашини кўрсатиб ўтади.