Устюртда сайғоқлар учун бешта автоном сув ичиш тизими ўрнатилди
Автоном тизимлар қуёш энергиясида ишлайди. Уларнинг ҳар бири 3 куб метр сиғимга эга сув ҳавзалари,
Устюртда сайғоқлар учун бешта автоном сув ичиш тизими ўрнатилди
Қорақалпоғистон Республикасидаги Экология ва иқлим ўзгариши миллий қўмитаси ҳузуридаги «Сайғочий» комплекс ландшафт буюртма қўриқхонасида ёввойи ҳайвонларни сув билан таъминлаш мақсадида бешта автоном сув ичиш тизими ўрнатилди.
Мазкур ташаббус Экология қўмитаси томонидан БМТ Тараққиёт дастури (БМТТД) ва Глобал экологик жамғарма (ГЕФ) билан ҳамкорликда «Арал Сеа Ветландс» лойиҳаси доирасида амалга оширилди.
Сув ресурслари чекланган Устюрт чўли шароитида қўшимча сув манбаларининг мавжудлиги сайғоқлар ҳамда маҳаллий фаунанинг бошқа вакилларини сақлаб қолишда катта аҳамиятга эга.
Автоном тизимлар қуёш энергиясида ишлайди ва тўлиқ автоматлаштирилган. Уларнинг ҳар бири 3 куб метр сиғимга эга сув ҳавзалари, насослар, датчиклар ва ҳисоблагичлар билан жиҳозланган. Бу марказлашган электр энергияси ва сув таъминоти манбаларига доимий уланиш талаб қилинмасдан сувни барқарор етказиб бериш имконини беради.
Сув ичиш тизимлари билан бирга ҳудудга 10 та камера ва 10 та фототузоқ ҳам ўрнатилди. Улар ҳайвонларни сутка давомида кузатиш, уларнинг ҳаракати ва сув ичиш жойларидан фойдаланишини қайд этиш, шунингдек, популясиялар ҳолатини кейинги мониторинг қилиш учун маълумот тўплаш имконини беради.
Устюртнинг оғир табиий шароитида яшайдиган сайғоқлар учун қўшимча сув манбаларини яратиш ёввойи ҳайвонлар популясияларини сақлаш ва тиклашда муҳим аҳамият касб этади.
Автоном сув ичиш тизимларининг ўрнатилиши Устюртда биохилма-хилликни асраш бўйича амалга оширилаётган чора-тадбирлардан бири бўлиб, замонавий кузатув воситалари орқали ҳайвонлар ҳолатини мониторинг қилиш ва зарур маълумотларни тўплаш имконини ҳам беради.