УС Опен турнирининг умумий мукофот жамғармаси рекорд даражага етди
УС Опен турнирининг умумий мукофот жамғармаси рекорд даражага етди
Теннис бўйича йилнинг сўнгги "Катта дубулға" мусобақаси бўлмиш АҚШ очиқ чемпионатининг (УС Опен) 2026-йилги турнири учун ажратиладиган мукофот пули рекорд даражага етиб, 108 миллион долларни ташкил этади. Бу ўтган йилги кўрсаткичдан 20 фоизга кўпдир.
Турнир ташкилотчиларининг хабар беришича, мукофот жамғармаси 2024-йилга нисбатан 44 фоизга ошган. Эркаклар ва аёллар ўртасидаги яккалик баҳсларида ғолиб чиққан ҳар бир теннисчи 5,5 миллион доллардан мукофот олади. Бу теннис тарихидаги энг юқори чемпионлик мукофотидир.
Асосий тўрнинг биринчи босқичида мағлуб бўлган теннисчилар ҳам 140 минг доллардан ишлаб олади. Бу ҳам "Катта дубулға" турнирлари тарихидаги энг юқори биринчи босқич мукофоти ҳисобланади.
Бундан ташқари, АҚШ теннис ассоциацияси (УСТА) теннисчиларни қўллаб-қувватлашга қаратилган янги дастур учун 2 миллион доллар ажратади. Ушбу маблағ эркак ва аёл теннисчилар ўртасида тенг тақсимланади.
Мукофот пулларининг оширилиши теннисчилар томонидан ижобий қабул қилинди. Аввалроқ спортчилар "Катта дубулға" турнирларидан олинадиган даромаднинг каттароқ қисмини талаб қилиб, норозилик аксияларини ўтказишни режалаштирганди. Мукофот жамғармаси оширилганидан сўнг теннисчилар бу йилги УС Опенъда норозилик намойиши ўтказмасликка қарор қилди.
Шу билан бирга, теннисчилар мукофот пулларининг оширилиши билан чекланиб қолмоқчи эмас. Улар барча "Катта дубулға" турнирларида мусобақалардан олинадиган даромадни теннисчилар ўртасида тақсимлашнинг ягона тизимини жорий этишни талаб қилмоқда.
Шунингдек, Австралия очиқ чемпионати, "Ролан Гаррос", "Уимблдон" ва УС Опен ташкилотчилари теннисчилар манфаатларини ҳимоя қилиш ва уларнинг фикрларини инобатга олиш мақсадида Гранд Слам Плаер Адвисорй Соунсил – "Катта дубулға" теннисчилар маслаҳат кенгашини тузди. Кенгаш 2026-йилги УС Опен якунланганидан сўнг фаолиятини бошлайди.
Маълумот учун, 2026-йилги УС Опен АҚШнинг Ню-Ёрк шаҳрида 30-августдан 13-сентябргача бўлиб ўтади. Турнирнинг амалдаги чемпиони испаниялик Карлос Алкарас ҳисобланади.