УС Опен. Жокович ва Сабаленка жуфтлиги илк босқичдаёқ мағлуб бўлди

УС Опен. Жокович ва Сабаленка жуфтлиги илк босқичдаёқ мағлубиятга учради

Ню-Ёрк шаҳрида старт олган "Катта дубулға" туркумига кирувчи УС Опен турнирининг аралаш жуфтлик баҳсларида асосий фаворитлардан бири саналган Арина Сабаленка ва Новак Жокович тандеми кутилмаган мағлубият билан мусобақани тарк этди.

Дунёнинг биринчи рақамли теннисчиси Арина Сабаленка ҳамда "Катта дубулға" турнирларининг 24 карра ғолиби Новак Жоковичдан иборат жуфтлик 1/8 финал босқичида Генри Паттен (Буюк Британия) ва Катерина Синиакова (Чехия) тандемига қарши кортга чиқди.

Кескин кечган учрашувда Сабаленка ва Жокович биринчи сетда 4:1 ҳисобида олдинда бораётганига қарамай, рақиблар мувозанатни тиклашга муваффақ бўлишди. Натижада чехиялик ва британиялик теннисчилар 1:4, 4:2, 10:2 (супер тай-брейк) ҳисобида ғалаба қозониб, чорак финалга йўл олдилар.

Шу тариқа, беларуслик ва сербиялик ракетка усталарининг жуфтлиги мусобақани биринчи даврадаёқ якунлади.

Маълумот учун, 38 ёшли Жокович АТП рейтингида 5-ўринни эгаллаб турибди. У фаолияти давомида 101 та титулни қўлга киритган бўлиб, улардан 24 таси "Катта дубулға" турнирлари ҳисобланади (эркаклар ўртасидаги рекорд натижа). Шунингдек, у 2024-йилги Париж Олимпиадасининг олтин, 2008-йилги Пекин Олимпиадасининг бронза медали соҳиби ва Девис Кубоги (2010) ғолиби бўлган. Сербиялик теннисчи жаҳоннинг биринчи ракеткаси сифатида АТП рейтингини бошқариш бўйича ҳам мутлақ рекордчи ҳисобланади.

Сабаленка 27 ёшда бўлиб, 2024-йилнинг октябр ойидан буён ВТА рейтингида биринчи ўринни эгаллаб келмоқда. Спортчи ҳисобида 23 та йирик турнирда ғалаба бор. У тўртта "Катта дубулға" турнирларида — икки мартадан Австралия очиқ чемпионати (2023, 2024) ва АҚШ очиқ чемпионатида (2024, 2025) зафар қучган.