“Уруш қуроллари ва географиясини ўзгартирамиз”. Эрон АҚШни огоҳлантирди
“Уруш қуроллари ва географиясини ўзгартирамиз”. Эрон АҚШни огоҳлантирди
Эрон АҚШ томонидан яна бир ҳужум уюштирилса, “янги имкониятларга эга янги қуроллар” ишга солиниши ҳақида огоҳлантирди. Бу баёнот Қўшма Штатлар президенти Доналд Трамп ўтган дам олиш кунлари Теҳронга нисбатан риторикани кескинлаштиргач билдирилди.
“Агар янги тажовуз содир бўлса, биз шубҳасиз қуролларни ҳамда уруш географиясини ўзгартирамиз”, деди 21-сентябр куни Эрон Ислом инқилоби қўриқчилари корпуси вакили Ҳусайн Муҳиббий Фарс ахборот агентлигига берган интервюсида.
Муҳиббий бу янги қуроллар айнан нималардан иборатлиги ва қайси янги ҳудудларга зарба берилиши мумкинлигига изоҳ бермади.
Шу билан бирга, Трамп урушни қандай давом эттириш борасида ҳали якуний қарорга келмаганини айтди. АҚШ президенти ҳам Эронга таҳдид қилиб, урушни тугатиш бўйича вариантлари орасида мамлакатни йўқ қилиб ташлаш, уларни иқтисодий жиҳатдан ҳолдан тойдириш ёки келишув тузиш борлигини маълум қилди.
“Бутун бир миллатни йўқ қилиб юборишим мумкин. Улар ўзларини яхши тутганлари маъқул”, деб огоҳлантирди Трамп.
Трамп аввалроқ БМТ Бош Ассамблеяси доирасида Эрон президенти Масъуд Пезешкиён билан учрашишга катта эҳтимол билан тайёр эканини айтган эди. Учрашув ўтказиш эҳтимоли Эрон билан деярли етти ойдан бери давом этаётган урушни ҳал этишга оз бўлса-да умид уйғотди.
Айни пайтда Трамп Фох Невс телеканалига Вашингтон Яман ҳусийлари билан доимий алоқада эканини ва гуруҳ АҚШ билан урушмасликка рози бўлганини айтди.
“Ҳусийлар бизга қўнғироқ қилди ва улар биз билан урушишни хоҳламайди. Улар бизнинг аралашмаслигимизни маъқул кўради ва кема қатновига тўсқинлик қилмаяпти”, деганди у сентябр ойи бошида.
Шунга қарамай, 19-сентябр куни вазият кескинлашди. Эрон томонидан қўллаб-қувватланадиган ҳусийлар Саудия пойтахти Ар Риёддаги муҳим обьектларга ҳамда Янбу портидаги Арамсо нефт иншоотига баллистик ракеталар ва дронлар орқали ҳужум қилди.
Тҳе Нев Ёрк Тимес нашрининг 21-сентябр куни хабар беришича, АҚШ президенти 20-сентябр куни ҳусийларга қарши Саудия Арабистони билан биргаликда зарба бериш имкониятини кўриб чиққан, бироқ охир-оқибат бундан воз кечган.
Яқин Шарқдаги уруш оқибатида Эрон стратегик аҳамиятга эга Ҳормуз бўғозини тўсиб қўйган. Унинг Ямандаги иттифоқчилари — ҳусийлар эса Саудиядаги муҳим нефт қувурини портлатди ва Боб ал-Мандаб бўғозига таҳдид солмоқда. Юзага келган иқтисодий инқироз АҚШ ва жаҳон иқтисодиётига зарба бериб, нефт ва дизел нархининг ошишига ҳамда инфлацияга сабаб бўлди.
АҚШ президенти аввалроқ Эрон уруши ноябр ойидаги оралиқ сайловларга қадар тугамаслигини айтган эди. У нефт нархи ҳам ўша вақтгача тушмаслигини таъкидлаган. Шунингдек, куни кеча Эрон АҚШга Қатар орқали урушни тугатиш шартларини маълум қилди. 21-сентябр куни АҚШ ва Эрон ўртасида музокаралар қайта бошланиши умиди кучайгани сабабли нефт нархи сўнгги бир ҳафтадан ортиқ вақт ичидаги энг паст даражага тушди.