“Уруш оқибатлари чегара билмайди”. Исроил Ғазодаги канализация тизимини вайрон қилгани сабаб ўзи сув танқислигига дуч келди

“Уруш оқибатлари чегара билмайди”. Исроил Ғазодаги канализация тизимини вайрон қилгани туфайли ўзи сув танқислигига юз тутди

Ғазо секторидаги оқова сув инфратузилмаси вайрон бўлгани сабаб денгизга тозаланмаган канализация сувлари оқиб тушмоқда. Натижада микро сувўтлар кескин кўпайди ва Исроилдаги сувни чучуклаштириш заводлари фаолияти издан чиқди. Шу боис мамлакат сув танқислигига дуч келмоқда.

“Уруш оқибатлари чегара билмайди”, деди Фаластиндаги экологик ташкилот ЭсоПеасе Миддле Эаст директори Нада Маждалани.

Мутахассислар Ғазо канализациясидан чиққан тозаланмаган сув таркибидаги моддалар сув ўтларини озиқлантириб, уларнинг кўпайишига сабаб бўлганини айтмоқда.

Денгиздаги сувўтлари Исроилнинг олтита асосий сувни чучуклаштириш заводидан бештасидаги филтрларни тиқилтириб қўйган. Шу сабаб корхоналар бир неча кун ишламай қолди ва ҳозир чекланган қувватда фаолият юритмоқда.

Бен-Гурион университети профессори Жек Гилроннинг айтишича, бу ҳолат Исроилнинг ичимлик суви манбаларига таҳдидлар қанчалик жиддий эканини кўрсатди. Расмийлар аҳолига сувни тежашни тавсия қилмоқда, фермерларга эса экинларни суғориш тақиқланган. Бу озиқ-овқат нархларининг ошишига олиб келиши мумкин.

Халқаро ташкилотлар маълумотига кўра, 2023-йил 7-октябрдан бери Исроил ҳужумлари Ғазодаги сув ва санитария инфратузилмасининг 90 фоизини вайрон қилган. Қудуқлар, сув қувурлари ва тозалаш иншоотлари ишдан чиққан.

Ғазодаги сув хўжалиги вакили Омар Шататнинг айтишича, ҳудуддаги барча 5 та оқова сув тозалаш иншооти тўхтаган. Натижада ҳар куни 45 минг куб метр тозаланмаган канализация суви Ўрта Ер денгизига оқмоқда, яна 15 минг куб метри эса ерости сувларига аралашмоқда.

Сув ва канализация тизимининг издан чиқиши Ғазода ошқозон-ичак ва тери касалликлари ҳамда А гепатитининг тарқалишига сабаб бўлди. Аҳоли чодирлар ва кўчаларда оқаётган оқова сувлар қуршовида яшашга мажбур.

Бундан ташқари, Ғазода каламушлар ҳам кўпайиб кетган. Бу муаммо Исроилнинг чегара ҳудудларига ҳам тарқалиб, аҳоли хонадонларига кемирувчилар ёпирилмоқда. ЭсоПеасе Миддле Эаст ташкилоти экспертлари бу ҳолат бутун минтақа учун катта экологик ва тиббий фожиага айланиши мумкинлиги ҳақида огоҳлантирмоқда.