“Уруш даврида тинчлик — биринчи масала”. Зеленский нима учун ҳозир сайлов ўтказиб бўлмаслигини тушунтирди
“Уруш даврида тинчлик — биринчи масала”. Зеленский нега ҳозир сайлов ўтказиб бўлмаслигини изоҳлади
“Мен буни (президентлик сайловини) эртагаёқ ўтказишга тайёрман, аммо уруш давом этар экан, конституция, сайлов қонунчилиги ёки энг аввало хавфсизлик ҳолатини ҳисобга олган ҳолда бундай қилиш мумкин эмас”, деди президент.
Шу билан бирга, Зеленский ҳозирги вазиятда сайлов ўтказилса, юзага келадиган бир қатор муаммоларни ҳам эслатди. Хусусан, у болалар мактабга бора олмаётган ва 9 миллионга яқин украиналик чет элда юрган шароитда сайловларни қандай ташкил этиш мумкинлигини сўради. Президентнинг айтишича, одатий сайловларда ярим миллионга яқин одам Украинадан ташқарида овоз берарди.
Зеленский, шунингдек, Россия истилоси остида қолган украиналикларнинг сайловларда қатнашиши масаласини ҳам кўтарди.
“Вақтинча босиб олинган ҳудудларда яшаётганлар ҳақида нима дейиш мумкин? Улар овоз бера оладими, ҳа бўлса қандай қилиб, у ердаги сайлов жараёнини ким кузатади? Ахир, бу ҳудудларда рус аскарлари бор”, деб таъкидлади Украина раҳбари.
Зеленскийнинг фикрича, Украинада сайловларни қўллаб-қувватлаётганлар фақат сиёсатни ўйлашмоқда.
“Менимча, бу хато. Уруш пайтида тинчлик биринчи рақамли мақсад ҳисобланади. Сиёсат ҳатто иккинчи ўринда ҳам турмайди”, деди у.
“Бу урушда ғалаба бўлиши мумкин эмас”
Интервюда Зеленский Россия ва Украина ўртасидаги урушда энди ҳар икки томон учун ҳам ғалаба имконсиз эканини айтди.
“Бу урушда ғалаба қозониш мумкин эмас. Шунча қурбонлар туфайли ғалаба биринчи кунданоқ иккала томон учун ўз моҳиятини йўқотди”, деди Зеленский.
Унинг айтишича, ҳозирда икки томон учун фойдали бўлган формулани излаш эмас, балки одамлар ҳаётини сақлаб қолиш учунгина урушни тўхтатиш чинакам ғалаба бўлар эди.
Унинг фикрича, АҚШ Россиянинг урушни давом эттириш имкониятларини чеклаш учун қатъийроқ ҳаракат қилиши керак.
“Дунёдаги энг катта ҳудудга эга Россия шу бир неча километр ҳудудга муҳтожми? Айрим ҳамкорлар унга Украинанинг фақат бир қисми, мана шу километрлар керак, холос, дейиши жуда ғалати”, деди президент.
У Россия етакчисига муайян ҳудудлар етарли деган ғояни ақлсизлик деб атади ва Путин бутун Украинани қўлга киритишни хоҳлаётганини айтди.