“Украинага исталган пайт бориб, деярли истаган нарсамизни олишимиз мумкин” — Доналд Трамп
**"Украинага исталган вақтда бориб, деярли истаган нарсамизни олишимиз мумкин" — Доналд Трамп**
АҚШ ва Украина ўртасида фойдали қазилмалар ҳамда нодир металлар бўйича имзоланган келишув Вашингтонга мамлакатнинг ушбу ресурсларидан деярли чекланмаган даражада фойдаланиш имконини беради. Президент Доналд Трамп бу ҳақда 31-июл куни эълон қилинган Реал Америсаъс Воисе телеканалига берган интервюсида маълум қилди.
Трамп Украинанинг нодир металлар захираларига жуда бой эканини айтиб, АҚШ исталган вақтда у ерга бориб, деярли истаган ресурсини олиши мумкинлигини таъкидлади.
"Украина нодир металларга жуда бой ва унумдор ҳудудларга эга. Биз минераллар бўйича шартнома имзоладик. Энди у ерга исталган вақтда бориб, деярли истаган нарсамизни олишимиз мумкин", деган АҚШ президенти.
Унинг таъкидлашича, бу Вашингтон учун "жуда фойдали битим" бўлган.
**АҚШ ва Украина ўртасидаги ресурслар бўйича келишув**
2025-йил 1-май куни АҚШ молия вазири Скотт Бессент ва ўша пайтдаги Украина иқтисодиёт вазири Юлия Свириденко Вашингтонда Америка—Украина тикланиш инвестиция жамғармасини ташкил этиш тўғрисидаги битимни имзолаган эди.
Келишувга кўра, жамғарма Украинада қазиб олинадиган фойдали қазилмалардан олинадиган даромадлар ҳисобидан молиялаштирилиши кўзда тутилган.
Доналд Трамп ушбу битимни имзолашга бир неча ой давомида ҳаракат қилган. У АҚШнинг Украинага кўрсатган ҳарбий ёрдами эвазига Киев Вашингтонга минерал ресурслардан фойдаланиш имкониятини бериши кераклигини бир неча бор таъкидлаган.
Трамп аввалроқ мазкур келишув АҚШга 350 миллиард доллардан ҳам кўпроқ фойда келтиришини билдирган эди. Унинг сўзларига кўра, Россия бошлаб берган уруш даврида Вашингтон Украинага шунча миқдорда ёрдам кўрсатган.
Бироқ Украинада мазкур келишув танқидларга ҳам учраган. Танқидчиларга кўра, битимда Киев учун муҳим бўлган хавфсизлик кафолатлари назарда тутилмаган.
Аввалроқ Россия президенти Владимир Путин АҚШга Россиядаги нодир металларни қазиб олишни таклиф қилган эди. У икки мамлакат биргаликда алюминий ишлаб чиқариши мумкинлигини ҳам айтганди.