Украинада «Сенс Банк» кузатув кенгаши раиси олти ойга четлатилди
Украина ҳукумати давлатга қарашли «Сенс Банк» кузатув кенгаши раиси Николай Гладишенкони олти ой муддатга ваколатларини бажаришдан четлатди. Унинг номи мамлакат коррупсияга қарши органлари томонидан пул маблағларини легаллаштириш билан боғлиқ жиноий схема юзасидан олиб борилаётган тергов материалларида тилга олинган.
Украинада «Сенс Банк» кузатув кенгаши раиси олти ойга лавозимидан четлатилди.
Украина ҳукумати 19-август куни «Сенс Банк» давлат банки кузатув кенгаши раиси Николай Гладишенкони олти ой муддатга ўз вазифаларини бажаришдан четлатиш тўғрисида қарор қабул қилди.
Украина Молия вазирлиги матбуот хизматининг хабар беришича, бу қарор Коррупсияга қарши миллий бюро (КҚМБ) ва Коррупсияга қарши ихтисослаштирилган прокуратура (КҚИП) томонидан эълон қилинган очиқ маълумотлар асосида қабул қилинган.
Вазирлик Гладишенконинг вақтинча четлатилиши банк кузатув кенгашининг самарали ва лозим даражада ишлашига таҳдид солиши мумкин бўлган хавфларни бартараф этишга қаратилганини таъкидлади. Хусусан, банкдан пул маблағларини легаллаштириш мақсадида фойдаланиш эҳтимоли билан боғлиқ хатарлар қайд этилган.
Шунингдек, Украина Вазирлар Маҳкамаси «Сенс Банк» бошқаруви раиси Алексей Ступакни ҳам лавозимидан четлатиш ташаббусини илгари сурди.
Украина бош вазири Сергей Корецкий коррупсияга қарши органлар ошкор қилган маълумотлар тегишли ҳуқуқий ва сиёсий баҳо олиши кераклигини таъкидлади. Унинг сўзларига кўра, «Коррупсияга қарши органлар эълон қилган фактлар тегишли баҳолашни талаб қилади ва улар жавобсиз қолиши мумкин эмас. Ишонч давлат молия муассасасида фаолият юритишнинг принсипиал шартидир».
Бош вазир ҳукумат тергов материалларида исмлари тилга олинган «Сенс Банк»нинг бошқа мансабдор шахсларига нисбатан ҳам тегишли кадрлар бўйича қарорлар қабул қилинишини кутаётганини билдирди.
19-август куни КҚМБ «Сенс Банк» кузатув кенгаши офисида, жумладан Николай Гладишенко билан боғлиқ жойларда тинтув ўтказгани маълум бўлди.
Ўша куни КҚМБ ва КҚИП «Форрест Гамп» деб номланган махсус операция доирасида собиқ энергетика ва адлия вазири Герман Галущенко учун гаров пулини тўлаш мақсадида маблағларни легаллаштириш схемаси фош этилганини билдирди.
Тергов маълумотларига кўра, гап 150 миллион гривна нақд пул ҳақида бормоқда. Мазкур маблағлар бир нечта сохта компаниялар ҳисобварақлари орқали қонуний муомалага киритилиб, кейин гаров пули сифатида тўланиши режалаштирилган.
КҚМБ маълум қилишича, жиноий схема иштирокчилари орасида Украина президенти офиси раҳбари ўринбосари, собиқ халқ депутати, давлат банки бошқаруви раиси ва кузатув кенгаши раҳбари ҳамда бошқа шахслар бўлган.
ОАВ маълумотларида президент офиси раҳбари ўринбосари сифатида Ирина Мудрая, собиқ депутат сифатида эса Максим Микитас номи келтирилмоқда. Бироқ бу шахсларга оид маълумотлар тергов органларининг якуний хулосаси эмас ва уларнинг айби суд қарори билан тасдиқланмаган.