Украинада коррупсия можароси: Зеленский ўз офисининг раҳбари ўринбосарини ишдан олди

Украина президенти Владимир Зеленский ўз офиси раҳбарининг ўринбосари Ирина Мудраяни лавозимидан озод этди. Бу қарор Миллий аксилкоррупсия бюроси (НАБУ) томонидан ўтказилган махсус операция ҳақидаги хабарлар ортидан қабул қилинди.

Зеленский 19-август куни "Мудрая Ирина Романовна Украина президенти офиси раҳбари ўринбосари лавозимидан озод этилсин" деган фармонни имзолади. Қарорнинг аниқ сабаби кўрсатилмаган бўлса-да, УНИАН нашрининг хабар беришича, бу НАБУ ва САП (Махсус аксилкоррупсия прокуратураси) томонидан ўтказилган қўшма махсус операция натижасида бир қатор сиёсий арбоблар бощилигидаги жиноий ташкилот фош этилганидан кейин содир бўлган.

Ушбу ташкилотга Украинанинг амалдаги ва собиқ халқ депутатлари, шунингдек, президент офисининг юқори мартабали амалдорлари ва бошқа шахслар жалб қилинган. НАБУ аниқ исмларни ошкор этмаган. Бироқ, "РБК-Украина" манбаларига кўра, иш бўйича эҳтимолий шахслар рўйхатида президент офиси раҳбари ўринбосари Ирина Мудрая, халқ депутати Вадим Столар ва собиқ халқ депутати Максим Микитас бўлиши мумкин. Депутат Алексей Гончаренко ҳам Ирина Мудраянинг уйида тинтув ўтказилаётганини маълум қилган.

**Украинадаги коррупсия можаролари**

10-ноябр куни "Энергоатом" давлат энергетика компанияси атрофидаги кенг кўламли коррупсия схемаси фош этилган эди. Бу жанжал марказида Украинанинг амалдаги ҳукуматидаги бир нечта вазирлар, президентнинг узоқ йиллик сафдоши Тимур Миндич ва молиячи Александр Сукерман бўлган. Ўша куни ҳуқуқ-тартибот идоралари Миндичнинг уйида, "Энергоатом"да ва Украина адлия вазири Герман Галущенконинг манзилида тинтув ўтказган. Миндичнинг Украинани тарк этгани аниқланган.

12-ноябр куни Зеленский адлия вазири Герман Галущенко ва энергетика вазири Светлана Гринчукни ишдан бўшатишни талаб қилди. Иккала вазир ҳам дарҳол истеъфога чиқиш тўғрисида ариза ёзди. 13-ноябр куни эса президент Миндич ва Сукерманга қарши санксиялар жорий этиш тўғрисидаги фармонни имзолади.

Украина президенти офисининг собиқ раҳбари Андрей Ермак эса Киев шаҳри яқинида "Династия" элита мажмуаси қурилишида 460 миллион гривна (10 миллион доллар)ни легаллаштириш иши бўйича гумонланмоқда. Сиёсатчи унга нисбатан айбловларни тан олмаган, унинг уйида тинтув ўтказилган. Ермак 14-май куни тергов изоляторига жойлаштирилган. Суд унга 140 миллион гривна (тахминан 3 миллион доллар) миқдорида гаров пули белгилаган. 18-май куни тегишли сумма йиғилган ва Ермак изолятордан чиқарилган.