Украина Хавфсизлик хизмати ва Бош разведка бошқармаси ходимлари ўртасида отишма юз берди. Сабаб нима?
Киевнинг Днепр туманида Украина Хавфсизлик хизмати ва Мудофаа вазирлиги Бош разведка бошқармаси ходимлари ўртасида отишма содир бўлди. Қуролли тўқнашув натижасида ҳарбий разведканинг камида уч нафар хизматчиси ўқотар қуролдан жароҳат олган, улардан икки нафарининг аҳволи оғир. Ички можарога асосий сабаб сифатида «Россия кўнгиллилар корпуси» командири ўринбосари Степан Каплуновнинг яширин тарзда қўлга олиниши келтириляпти.
Украина Хавфсизлик хизмати ва Бош разведка бошқармаси ходимлари ўртасида отишма юз берди. Сабаби нима?
**Каплуновнинг ғойиб бўлиши**
Можаро «Россия кўнгиллилар корпуси» Украина бўлинмаси командири ўринбосари Степан Каплуновнинг ғойиб бўлиши ортидан бошланган. У 23-август куни Киевдаги ҳовлисидан номаълум шахслар томонидан олиб кетилган. Бу ҳолат ҳуқуқий жиҳатдан жиддий саволларни келтириб чиқарган, чунки жараён ҳеч қандай процессуал тартибсиз амалга оширилган: ушлаб туриш баённомаси тузилмаган, адвокат ва таржимон иштироки таъминланмаган, гумондорнинг ўзига эса расмий айблов қўйилмаган. Бир ҳафтадан ортиқ вақт давомида Каплуновнинг сафдошлари ва адвокатига унинг аҳволи ҳақида аниқ маълумот берилмаган. «Россия кўнгиллилар корпуси» (РДК) штаб бошлиғи Александр Фортуна ҳам бир қатор кучишлатар идораларга расмий сўровлар юборганини, бироқ ҳеч биридан аниқ жавоб ололмаганини билдирган. Кейинчалик ҳибсдан озод этилган Каплунов Радио НВъга берган интервюсида вазиятни қуйидагича тасвирлаган.
«Мени ерга ётқизишди, қўлларимга кишан тақишди. Умуман олганда, тергов ҳаракатлари ва ҳибсга олиш жараёнлари қандай бўлишини озми-кўпми тушунаман. Одатда гумонланувчига қайси моддалар бўйича қандай айблов қўйилгани айтилади. Бу ерда эса мени шунчаки қора БМВ автомобилига тиқишди. Очиғини айтганда, бу ўғирлаш эди. Шундан сўнг қўлларимни кишанлаган, кўзларим скотч билан боғланган ҳолда олиб боришди. Менимча, бу қандайдир махсус режимдаги обьект ёки, бошқача айтганда, яширин қамоқхона бўлган. У ерда мени камерага жойлаштиришди, қўлларимни кишан ва занжир билан боғлашди. Бир неча сутка давомида кўзларим ҳам доим ёпиқ ҳолда бўлди», дея таъкидлаган у.
Кейинчалик Украина Хавфсизлик хизматидаги (СБУ) манбалар Каплунов Россия Федерал Хавфсизлик хизмати билан эҳтимолий алоқаларда гумон қилиниб олиб кетилганини маълум қилган.
**Шумский кўчасидаги отишма**
1-сентабрдан 2-сентабрга ўтар кечаси Украина Хавфсизлик хизматининг тезкор-тергов гуруҳи тинтув ўтказиш учун Степан Каплуновни яширинча унинг квартирасига олиб келади. Қандайдир тарзда бу ҳақдаги маълумот Бош разведка бошқармаси (ГУР) қўлига етиб боради. Каплуновнинг ушлаб турилишини «ўғрилик» деб баҳолаётган ГУР ходимлари ва «Россия кўнгиллилар корпуси» ҳарбийлари тезда бу ерга етиб келишади. Аввалига ўзаро келишувга эришилган бўлса-да, кейин вазият назоратдан чиқиб кетади. 2-сентабр тонгида юз берган отишма оқибатида камида уч нафар Разведка бошқармаси ходими яраланган. Уларнинг икки нафарининг аҳволи оғир экани айтилмоқда. Отишма сабаб полиция яқин атрофдаги бир нечта кўчани ёпган. Воқеа жойидан олинган суратларда ярадорлар ва ерда қон доғлари кўринади.