Украина сайловлар вақтида Москва бўйлаб энг йирик ҳужумини амалга оширди
Россия ҳудудлари бўйлаб 1600 дан ортиқ дрон учирилган – бу уруш бошидан буён кузатилган энг кенг кўламли ҳужум бўлди. Капотнядаги нефтни қайта ишлаш заводида яна ёнғин чиққан.
Украина сайловлар пайтида Москва устига энг йирик ҳужумини уюштирди
Россия ҳаво ҳужумидан мудофаа тизимлари Украина дронларининг Москвага қаратилган оммавий ҳужумини қайтарганини шаҳар мери Сергей Собянин маълум қилди. Унинг айтишича, тунда жами 1600 дрон ҳужум қилган, улардан 450 таси Москвага етиб келаётганида уриб туширилган. «Мисли кўрилмаган ҳужум сайловни бузиш мақсадида режалаштирилган эди. Душман бунга эриша олмади», – дея қўшимча қилган Собянин.
20-сентабр куни Россияда сайловларнинг учинчи куни. Бутун мамлакатда бўлгани каби Москвада ҳам Давлат думаси депутатлари сайланмоқда. Москва областида эса ҳудуд думаси учун ҳам сайловлар ўтказилмоқда. Москва ҳукумати порталида шаҳарда сайловларнинг учинчи куни «одатий режимда бошлангани» хабар қилинган.
Капотнядаги Москва нефтни қайта ишлаш заводи (МНПЗ) ҳудудида зарар қайд этилган. Гувоҳлар олган фото ва видеоларда корхона ҳудудида ёнғин чиққани кўринади. Бу завод мамлакатдаги нефтни қайта ишлаш бўйича энг йирик корхоналар қаторига киради. МНПЗ Москва шаҳри ва Москва области учун асосий ёнилғи етказиб берувчидир. Корхона илгари ҳам бир неча бор украин дронлари нишонига айланган.
Астра нашри гувоҳлар олган фото ва видеоларни таҳлил қилиб, ушбу заводга зарбалардан бири Россиянинг «Пансир» зенит-ракета комплекси фаолияти оқибатида берилган бўлиши мумкинлигини тахмин қилган.
Дронлардан бири Москвадаги турар жой биносига келиб урилган. Собянин манзилни аниқлаштирмаган, бироқ аввалроқ у Орехев хиёбони ҳудудидаги бино зарбага учраганини билдирганди.
Москва области губернатори Андрей Воробевнинг ҳисоботида 20-сентабр тонгида ҳаво ҳужумидан мудофаа тизимлари ва радиоелектрон кураш воситалари областнинг 17 та округида украинларнинг 249 та дронини зарарсизлантиргани айтилган.
Воробевга кўра, икки киши ҳалок бўлган (Орехово-Зуевский ҳамда Раменский округида яшовчилар), яна 20 га яқин одам жароҳат олган. Жабрланганлар орасида уч нафар бола ҳам бор. Жароҳатланганлардан 15 нафари шифохонага ётқизилган, яна олти нафарга воқеа жойида тиббий ёрдам кўрсатилган.
Унинг сўзларига кўра, энг оғир оқибатлар Раменский округида кузатилган. Шимолий шосседа дрон 21 қаватли турар жой биноси томига урилиб, ёнғин чиқарган. 400 киши эвакуация қилинган. 20 та автомобил шикастланган. Софино қишлоғида украин дрони уч қаватли бинога урилиши натижасида олтита квартира зарар кўрган.