Украина Россия нефтни қайта ишлаш заводларига зарба беришни тўхтатишга рози бўлмаган — ОАВ
Трамп маъмурияти Украинадан Россия нефтни қайта ишлаш заводларига зарбаларни ноябр ойи охиргача тўхтатишни сўраган. Киев Вашингтоннинг 30 кунлик танаффус таклифини рад этган ва Россия энергетика инфратузилмасига зарбаларни давом эттирмоқда.
Украина Россиядаги нефтни қайта ишлаш заводларига зарбаларни тўхтатишга рози бўлмаган — ОАВ
Украина Россия ҳудудидаги нефтни қайта ишлаш заводларига ҳужумларни давом эттирмоқда. Киев АҚШ босими остида бундай зарбаларни вақтинча тўхтатишга рози бўлгани ҳақидаги хабарларни инкор этди.
29-октябр куни Тҳе Валл Стреет Жоурнал операциялардан хабардор манбаларга таянган ҳолда, Украина Россия нефтни қайта ишлаш заводларига ҳужумларни вақтинча тўхтатишга келишиб олгани ҳақида ёзган эди.
Нашрга кўра, бу танаффус АҚШдаги оралиқ сайловларгача, эҳтимол ноябргача давом этиши керак бўлган. Айтилишича, бундай қарор Доналд Трамп маъмуриятининг кучли сиёсий босими ортидан қабул қилинган.
Шунга қарамай, Украина расмийлари Киев зарбаларни тўхтатиш бўйича ҳеч қандай келишувга бормаганини маълум қилди.
Хабар эълон қилинганидан 24 соат ҳам ўтмай, Украинанинг бир нечта дрони Россиянинг Самара вилоятидаги Новокуйбишевск нефтни қайта ишлаш заводига зарба берди. Телеграмъдаги мониторинг каналлари тарқатган видеоларда корхона устидан қуюқ қора тутун ва аланга кўтарилгани кўринган.
Украина расмийларининг Тҳе Кьив Индепендент нашрига айтишича, АҚШнинг махсус вакили Жаред Кушнер ҳақиқатан ҳам зарбаларни вақтинча тўхтатишни таклиф қилган, бироқ Киев бунга рози бўлмаган.
“Жаред нефтни қайта ишлаш заводларига 30 кун давомида зарба бермасликни таклиф қилди. Аммо бундай буйруқ берилмаган”, деди юқори мартабали украиналик амалдор.
Унинг сўзларига кўра, улар Тҳе Валл Стреет Жоурнал бу маълумотни қаердан олганини билмайди.
Россия нефтни қайта ишлаш заводига қилинган зарбалар Россиянинг Украина тинч аҳолисига қарши навбатдаги қонли ҳужумларидан кейин амалга оширилди. Днепр шаҳридаги темирйўл вокзалига реактив двигателли дрон билан берилган зарба оқибатида 15 киши ҳалок бўлди, камида 14 киши яраланди. Чернигов шаҳри марказига қанотли ракета билан уюштирилган ҳужумда эса 15 ёшли икки қиз ҳалок бўлди, 13 киши жароҳат олди.
30-октябр куни Украина президенти Владимир Зеленский Россия ҳужумларига жавоб қайтарилиши ҳақида баёнот берди.
“Россиянинг шаҳарларимиз ва аҳоли пунктларимизга берган ҳар бир зарбаси ҳар доим муносиб жавобимизга сабаб бўлади”, деди Зеленский.
Бироқ у Новокуйбишевск нефтни қайта ишлаш заводига қилинган ҳужум учун Украинани бевосита масъул деб атамади.
Украинанинг яна бир юқори мартабали расмийси мамлакат Россия энергетика инфратузилмасига зарбаларни давом эттиришини, бироқ Трамп маъмурияти билан атайлаб зиддиятга киришаётгандек таассурот уйғотмаслик учун бундай ҳужумлар учун расман жавобгарликни ўз зиммасига олмаслигини айтган.
Украина ҳукумати ҳужумга изоҳ бермаган бир пайтда, мамлакатнинг йирик мудофаа компанияларидан бири — Россия ҳудудига узоқ масофали зарбалар беришда қўлланадиган кўплаб дронларни ишлаб чиқарувчи Фире Поинт компанияси ҳужумни очиқчасига тан олди ва олқишлади.
Россия ҳукумати ҳам ўз нефтни қайта ишлаш заводларига Украина томонидан зарбалар берилганини тасдиқлади. Россия бош вазири ўринбосари Александр Новакнинг айтишича, 30-октябр куни Украина Россиянинг учта нефтни қайта ишлаш заводи ва битта газ-кимё мажмуасига ҳужум қилган.
“Бугун Россиянинг тўртта қайта ишлаш корхонасига яна ҳужум қилинди. Аниқроғи, учта нефтни қайта ишлаш заводи ва битта газ-кимё мажмуасига. Корхоналардан бирида кичик зарар қайд этилди, бироқ умуман олганда, ҳаво ҳужумидан мудофаа тизимимиз ўз вазифасини бажарди”, деди Новак.
Унинг таъкидлашича, қисқа танаффусдан кейин нефтни қайта ишлаш заводларига ҳужумлар яна бошланган ва корхоналар ўз хавфсизлигини таъминлаш чораларини кўрмоқда.
Украинанинг Россия энергетика инфратузилмасига қарши узоқ давом этаётган кампаниясидаги ягона танаффус АҚШ президенти Доналд Трамп 11-октябр куни бир томонлама “энергетик сулҳ” эълон қилганидан кейин юз берган эди.
Украина тахминан 72 соат давомида зарбаларни тўхтатган. Бироқ кўп ўтмай Россия Трамп эълон қилган келишув шартларига риоя қилиш ниятида эмаслиги маълум бўлган.
Тҳе Кьив Индепендент нашри билан суҳбатлашган АҚШ расмийсининг айтишича, Вашингтонда Украинанинг Россия нефт инфратузилмасига бераётган зарбаларига муносабат асосан бефарқлик билан чекланмоқда.
Трамп маъмуриятига яқин яна бир манбанинг таъкидлашича, маъмурият вакилларининг Украина ҳужумларига қарши чиқишлари кўпроқ АҚШ ички аудиториясига қаратилган. Унинг қайд этишича, Марказий разведка бошқармаси (СИА) ҳануз Украинага Россия ҳаво ҳужумидан мудофаа тизимларининг жойлашуви ҳақидаги разведка маълумотларини етказиб бермоқда. Бу маълумотлар Украинанинг Россия ҳудудига узоқ масофали зарбалар бериш кампаниясини амалга оширишига ёрдам бермоқда.