Украина Россия босиб олган ҳудудлардан яна 14 болани қайтарди
Херсон вилоятининг Россия босиб олган қисмидан 6 ёшдан 17 ёшгача бўлган 14 бола Украина назоратидаги ҳудудга қайтарилди. Улар тўрт ўғил ва 10 қиздан иборат, деб хабар берди вилоят ҳарбий маъмурияти раҳбари Александр Прокудин.
Украина Россия босиб олган ҳудудлардан яна 14 нафар болани қайтариб олди. ДВ хабарига кўра, Прокудин бу ҳақда 29-сентабр куни Телеграм каналида маълум қилган.
Унинг айтишича, қайтарилганлар орасида Россия ҳарбийлари ҳарбий ҳисобга туришга мажбурлаган 16 ёшли ўсмир ҳам бор. Шунингдек, хавф-хатарларга қарамай, украин таълимини олишга интилган 17 ёшли қиз ҳам Украина назоратидаги ҳудудга олиб чиқилган.
Болалар Украина президенти Володимир Зеленскийнинг Бринг Кидс Баск УА ташаббуси доирасида, Саве Украине хайрия ташкилоти кўмагида қайтарилган.
Прокудиннинг маълум қилишича, 2026-йил бошидан буён Херсон вилоятининг босиб олинган ҳудудларидан жами 204 бола Украина назоратидаги ҳудудга олиб чиқилган.
Украина расмийлари маълумотига кўра, апрел ойи охири ҳолатида украин болаларини Россияга депортация қилиш ёки мажбуран кўчириш билан боғлиқ 20 570 дан ортиқ ҳолат тасдиқланган.
Ўша пайтгача 2126 болани қайтаришга муваффақ бўлинган. Бу рақамга Россияга мажбуран олиб кетилганлар, вақтинча босиб олинган ҳудудлар ичида кўчирилганлар, шунингдек, бошқа жойга кўчирилмаган, аммо Россиянинг «қайта тарбиялаш» амалиётига дучор бўлган болалар ҳам киритилган.
ДВ қайд этишича, БМТнинг мустақил халқаро комиссияси украин болаларининг ноқонуний депортация қилиниши ва уларнинг Россияда узоқ муддат қолиши учун шароит яратилишини инсониятга қарши жиноятлар деб баҳолаган.
2023-йил мартида Ҳаагадаги Халқаро жиноят суди Украина босиб олинган ҳудудларидан болаларни ноқонуний депортация қилиш ва кўчириш билан боғлиқ ҳарбий жиноятларда гумон қилиб, Россия президенти Владимир Путинни ҳибсга олишга ордер берган. Россия президенти ҳузуридаги болалар ҳуқуқлари бўйича вакил Мария Лвова-Беловага нисбатан ҳам шундай ордер чиқарилган.
28-сентабр куни Европа Иттифоқи украин болаларининг Россияга ноқонуний депортация қилиниши муносабати билан 10 жисмоний ва 17 юридик шахсга санксия жорий этган. Чекловлар болаларни мажбуран кўчириш ва ассимиляция қилиш, жумладан, мафкуравий таъсир ўтказиш ҳамда ҳарбийлаштиришга масъул деб кўрсатилган шахс ва ташкилотларга қаратилган.