Украина асирдаги шимолий кореялик ҳарбийларни Жанубий Кореяга топширди

Украина асирга олинган шимолий кореялик ҳарбийларни Жанубий Кореяга топширди

Украина Россия томонида жанг қилган икки нафар шимолий кореялик ҳарбий асирни Жанубий Кореяга юборди. Бу ҳақда Украина президенти Владимир Зеленский БМТ Бош Ассамблеясидаги нутқида маълум қилди.

“Яқинда биз КХДРнинг икки нафар ҳарбий асирини Корея Республикасига топширдик”, деди Зеленский.

У асирлардан бири қўлга олиниши мумкинлигини англаб, ўз жонига қасд қилишга уринганини ҳам қўшимча қилди.

“Улардан бири асирга тушишини англагач, ўз жонига қасд қилишга уринди. У тақдир уни ўлимдан сақлаб қолганидан ҳайратда қолди”, деди Украина президенти.

Украина ҳарбийлари бу икки аскарни 2025-йил январида Россиянинг Курск вилоятида асирга олган. Улар 2024-йилда КХДР урушга қўшилганидан бери тириклайин ушланган илк шимолий кореялик ҳарбийлар бўлган.

Дастлаб Зеленский уларни Россиядаги украиналик асирларга алмаштириш учун Ким Чен Инга топширишга тайёрлигини билдирган. Бироқ ҳуқуқшунослар аскарларни КХДРга қайтариш уларнинг ҳаёти учун хавфли эканини айтган. Жанубий Корея ОАВ хабарига кўра, асирларнинг ўзлари ҳам Жанубий Кореяга ўтиш истагини билдирган.

Жанубий Корея парламенти депутати Ю Ёнг Воннинг маълум қилишича, асирлар ўтган дам олиш кунларида Украинадан чиққан. Улар учинчи давлат орқали Жанубий Кореяга уч-тўрт кун олдин етиб келган.

“Уларнинг аниқ қаердалиги ошкор этилмаяпти. Разведка хизматимиз уларни хавфсиз жойда сақламоқда”, деди депутат.

Жанубий Корея Ташқи ишлар вазирлиги хавфсизлик нуқтайи назаридан бу маълумотни расман тасдиқламади.

Зеленский ўз нутқида КХДР раҳбариятини кескин танқид қилди.

“Бу шунчаки аҳмоқлик. Нега кореяликлар Украинага қарши урушда ҳалок бўлиши керак? Ким Чен Ин улардан пул ўрнида фойдаланмоқда”, деди Украина президенти.

Украина ва Жанубий Корея ҳисоб-китобларига кўра, КХДР 2024-йилдан бери Россияга 14–15 минг атрофида ҳарбий юборган. Уларнинг аксарияти Курск вилоятида жанг қилмоқда. Шунингдек, Шимолий Корея Москвага миллионлаб артиллерия снарядлари ва ракеталар етказиб берган.

Аввалроқ Россия Украинага қарши урушда қўлланиладиган дронларни йиғишга 25 минг нафаргача Шимолий Корея фуқаросини жалб қилгани ҳақида хабар берилганди. Бу ҳақда АҚШ, Германия, Жанубий Корея, Япония ва бошқа давлатлар томонидан тузилган Санксиялар мониторинги бўйича кўп томонлама гуруҳ (МСМТ) маълум қилган.

Маълумотларга кўра, Россия КХДР фуқароларини ҳарбий дронлар ишлаб чиқаришга тобора фаолроқ жалб қилмоқда. Бундай ҳамкорлик Пхенянни ноқонуний қурол ишлаб чиқариш дастурларини молиялаштириш учун муҳим даромад манбаи билан таъминлайди, дейилади ҳисоботда.