Украина аҳолиси сиреналар учун «ҳаддан ташқари чарчаган»
Уитчерч шаҳар кенгаши аъзоси Грегори Эббс Украинага инсонпарварлик ёрдами билан тўлдирилган хайрия қилинган автомобилни етказиб берди.
**Украина аҳолиси сиреналар сабабли «ҳаддан ташқари ҳолдан тойган»**
Украинага ёрдам олиб борган кенгаш аъзоси у ердаги одамлар «ҳолдан тойгани» ва ҳаво ҳужуми сиреналари жуда тез-тез чалингани сабабли энди уларга уйғонмаётганини айтди.
Шропширдаги Жанубий Уитчерч округидан Либерал-демократлар партияси кенгаш аъзоси Грегори Эббс хайрия қилинган автомобиль, шунингдек, тиббий буюмлар, асбоб-усгуналар ва иссиқ кийимларни етказиб бериш учун Львов ва Киевга сафар қилди.
«Apprentice» реалити-шоусининг собиқ иштирокчисининг айтишича, маҳаллий аҳоли унга баллистик ракета хавфи эълон қилинмагунча энди бомба бошпаналарига тушмасликларини айтган.
«Муайян даражада ҳолдан тойиш кузатилмоқда», — деди у BBC’га. «Одамлар ҳайрон бўлишмоқда — нега бу ерда эканингизни сўрашади — кўнгиллилар у ерга бораётгани уларга жуда ёқади... лекин улар шунчаки ҳолдан тойган».
Аввал шимоли-ғарбий Львов шаҳрига сафар қилгач, Эббснинг айтишича, ёрдам PTAHA инсонпарварлик ташкилотига топширилган.
Унинг таъкидлашича, шаҳарга уруш «деярли тегмаган», аммо инсоний йўқотишлар ва талафотлар аниқ кўриниб турарди.
«Оёғи, қўли ёки кўзидан айрилган одамлар бор эди — бу жуда кенг тарқалган... лекин шаҳарнинг ўзига зарар етмаган», — деди у.
Эббснинг қўшимча қилишича, биринчи кечада у тўхтаган жойдан беш миля атрофида бешта портловчи дрон қайд этилган ва «тун бўйи сиреналар ва огоҳлантиришлар қайта-қайта чалинган».
Эббснинг айтишича, урушнинг таъсири Киевда яққол кўриниб турарди
Унинг сўзларига кўра, пойтахт Киевга етиб боришгач, вазият «жиддийлашган».
«Шаҳарга кирмасинггизданоқ GPS ишламай қолади, интернет ўча бошлайди, ҳар 15 дақиқада ҳаво ҳужуми сиреналари чалинади ва атрофингиздаги вайронагарчиликлар жуда яққол кўринади», — деди у.
«Кўплаб омборлар, бинолар вайрон қилинган... кўприклар портлатилган».
Шаҳарда у хайрия қилинган Citroen Xsara автомобилини олиш учун Одессадан келган тиббиёт ходимлари билан учрашди.
Эббснинг айтишича, уларнинг олдинги транспорти вайрон бўлган ва 70 кишилик жамоага одамларни ташиш учун фақат иккита автомобиль қолган эди.
У ерда бўлганида, такси ҳайдовчиси сиреналар овозига жуда ўрганиб қолгани сабабли ҳаво ҳужуми сиренаси чалинганда энди уйғонмаслигини айтган.
Эббс келажакда «албатта» яна қайтиб боришини айтди
Шундан сўнг Эббс поездда Львовга тўққиз соатлик йўл босди ва йўлда поезддан эвакуация қилинди.
«Поезд дала ўртасида тўхтайди ва ҳамма ундан тушади», — деди у.
«Ҳаммамиз кексалар ва ёшларнинг энг яқин ўрмон чизиғигача пиёда боришига ёрдам бердик.
«Бизга дрон яқинлашаётгани ва агар у поездни портлатиб юборса, ундан узоқда туришимиз муҳимлиги маълум қилинди», — тушунтирди у.
Уйига қайтгач, у кўпроқ ёрдам етказиб бериш учун мамлакатга «албатта» яна қайтиб боришини айтди.
«Бу транспорт воситалари, бу ёрдам сўзнинг томор маъносида инсонлар ҳаётини сақлаб қолади», — деди у.
«Бу жуда муҳим ва агар озгина бўлса ҳам ёрдам бера олсам, қўлимдан келганини қиламан.
«Тинч аҳолига етказилаётган зарар таъсири фақат ёмонлашиб боради», — дея қўшимча қилди у.