Уиткофф Украина билан музокара вақтида Путин билан гаплашиб келган – НЙТ
Американинг Нев Ёрк Тимес нашри жума куни Америка сиёсатида содир бўлган қизиқ инсайд билан бўлишди. Айнан ўша куни Трамп ва Путин телефон суҳбати чоғида дизел келишувига эришганди. Маълум бўлишича, худди шу вақт Трампнинг дўсти Стив Уиткоффга тегишли Маямидаги голф-клубда катта музокара ўтказилаётган бўлган ва ...
Уиткофф Украина билан музокара пайтида Путин билан гаплашиб келган – НЙТ
Трамп Путин билан дизел бўйича келишаётган пайтда АҚШ, Украина ва Европа вакиллари учрашув ўтказаётган эди. Украинлар ўз таклифини, европаликлар эса ўз таклифини билдирган пайтда, бутун Америка номидан гапириш ваколатига эга бўлган Уиткофф «Шошмай туринг, жаноблар, мен ҳозир келаман», деб хонадан чиқиб кетган ва қаерга боргани маълум бўлди: Путин нима деяётганини эшитиш учун унинг Трамп билан суҳбатига учинчи одам бўлиб қўшилган!
Бутун инсоният ҳаётига таъсир қиладиган масала муҳокамаси бирор расмий идорада ҳам, маҳаллий ҳокимлик биносида ҳам эмас, Маямидаги хусусий голф-клубда ўтказилган. Ишониш қийин, аммо дунёдаги энг қудратли давлат АҚШ дипломатияси ҳозир ана шундай кўринишда.
«Разведкадаги манбаларидан» инсайд хабарлар улашишни яхши кўрадиган Нев Ёрк Тимес газетасининг ёзишича, жума куни Маямидаги мистер Уиткоффга тегишли голф-клубда АҚШ, Украина ва Европа вакиллари иштирокида учрашув бўлиб ўтган. АҚШ номидан, табиийки, Трампнинг дўсти Уиткофф ва яҳудий куёви Кушнер қатнашган. Европа номидан эса Олмония, Франсия ва Британия лидерларининг миллий хавфсизлик бўйича маслаҳатчилари, шунингдек, Европа Иттифоқи ва НАТОдан ҳам юқори мартабали мулозимлар бўлган.
Учрашув давомида украиналиклар урушни тугатиш бўйича ўз таклифларини билдирган, европаликлар ҳам тайёрлаб келган режасини айтган. Шу пайт мистер Уиткофф меҳмонлардан узр сўраб хонани тарк этган. Суҳбат 6 соатга чўзилган, Уиткофф 70 га киряпти, қаерга кетгани аниқ-ку, дейишга шошилманг, гап сиз ўйлаган танаффус ҳақида эмас. Музокарачилар раҳбари Россия президенти Путин нима дейишини эшитиш учун унинг Трамп билан суҳбатига учинчи одам бўлиб қўшилган.
НЙТ берган хабардан Трамп ҳам голф-клубда бўлган, деб ўйлаш мумкин, лекин аслида бундай бўлмаган. Уиткоффни Маямидан туриб Оқ уйдаги Трамп ва Кремлдаги Путин ўртасидаги суҳбатга онлайн улашган. Зўр-а, дунёдаги икки қудратли кабинетдан туриб ўтказилаётган суҳбатга Маямидаги голф-клубдан учинчи одамни конференсия қилиб қўшишган. Худди ўн йиллар аввал мобил алоқа энди ривожланаётганда синфдошлар суҳбатига бир-бирларини қўшгани каби.
Путин ва Трамп бир футбол ўйини вақтида гаплашган. Америка «Зеленскийнинг додини бериш учун» Россиядан дизел сотиб олиши бўйича келишган. Уиткофф буларнинг барчасини эшитиб, бояги хонага қайтган ва «Жаноблар, мана шундай келишув бўлди, Россиядан санксиялар олиб ташланди, биз энди улардан «солярка» оламиз», деган. Украина делегацияси бу гапни эшитганда қандай аҳволга тушганини тасаввур қилаверинг.