Уганда Сомалидан ўз қўшинларини олиб чиқишни бошлади

Уганда ўз қўшинларини Сомалидан олиб чиқишни бошлади

Уганда ўз қўшинларини Сомалига илк бор 2007 йилда юборган эди

Уганда ушбу мамлакатдаги қарийб 20 йиллик ҳарбий иштирокидан сўнг ўз қўшинларини Сомалидан олиб чиқишни бошлади.

Уганда армияси раҳбари генерал Мухоози Кайнеругабанинг баёнотидан сўнг, жума куни Уганда Мудофаа халқ кучларининг (UPDF) 109 нафар ҳарбий хизматчидан иборат биринчи гуруҳи пойтахт Могадишони тарк этгани хабар қилинмоқда.

Уганда армияси матбуот котиби вазифасини бажарувчи Крис Магези Би-би-сининг шарҳ бериш сўровига жавоб бермади.

Уганда Сомалига Африка Иттифоқининг Сомалидаги миссияси (Amisom) доирасида қўшин жойлаштирган биринчи Африка давлати бўлган эди. Ушбу миссия 2007 йилда мамлакатнинг ўтиш даври ҳукуматини исломчи жангарилар ҳужумларидан ҳимоя қилишга ёрдам бериш учун тузилган.

Ўтган ҳафтада генерал Мухоози Уганда ўз қўшинларини олиб чиқишни бошлаганини ва хавфсизликни таъминлаш вазифаларини Сомали кучларига топширишини айтди.

«Биз ваъда қилганимиздек, UPDF кучларини Сомалидан олиб чиқишни бошладик. 20 йиллик кўплаб қон ва фидокорликлардан сўнг, биз хавфсизликни сомалилик биродарларимизга топширмоқдамиз», — деб ёзди у X тармоғида.

Қўшинларни олиб чиқиш босқичма-босқич амалга оширилмоқда ва 2027 йил август ойида якунланиши кутилмоқда.

Шунга қарамай, Уганда Сомалидаги бутун ҳарбий иштирокига чек қўймаяпти. Икки томонлама алоҳида хавфсизлик келишуви бўйича жойлаштирилган қўшинлар мамлакатда қолади.

Тахминларга кўра, Африка Иттифоқи миссияси доирасида Сомалида 4 500 нафар ҳарбий бор, яна 2 000 га яқини эса икки томонлама келишувлар орқали жойлаштирилган.

Сомали йигирма йилдан ортиқ вақтдан бери Ал-Қоидага алоқадор «Аш-Шабаб» жангари гуруҳига қарши узоқ ва қонли уруш олиб бормоқда.

Уганда кучлари мамлакатга илк бор 2007 йилда жойлаштирилган ва «Аш-Шабаб»ни Могадишо ҳамда бошқа йирик шаҳарлардан сиқиб чиқаришда муҳим роль ўйнаган.

Улар стратегик ҳудудларни қайтариб олиш ва асосий давлат объектлари хавфсизлигини таъминлаш учун Сомали Миллий армияси билан биргаликда жанг қилдилар.

Уганда қўшинлари ўз ҳарбий иштирокини Африка Иттифоқининг кейинги миссиялари, жумладан, хавфсизлик учун масъулиятни босқичма-босқич Сомалига топшириш мақсадида бошланган Африка Иттифоқининг Сомалидаги ўтиш миссияси (Atmis) доирасида давом эттирди.

Унинг ўрнини 2025 йилда Африка Иттифоқининг Сомалидаги қўллаб-қувватлаш ва барқарорлаштириш миссияси (Aussom) эгаллади. Бу миссия Сомали хавфсизлик институтларини мустаҳкамлаш ва унинг кучларини мамлакат хавфсизлиги учун тўлиқ масъулиятни ўз зиммасига олишга тайёрлашга қаратилган.

АҚШ ва БМТ томонидан кўрсатилаётган ёрдамни камайтириш режалари фонида, Aussom эндиликда келажакдаги молиялаштириш бўйича ноаниқликка дуч келмоқда.

Январь ойида 12 ойлик ўтиш режаси бошланиши керак, бу Сомали ва Африка Иттифоқига муқобил молиялаштириш манбаларини излаш учун вақт беради.