УЕФА еврокубоклар учун янги қоида жорий этди
УЕФА Европа клублари мусобақалари учун янги қоидаларни жорий қилди.
Европа футбол ассоциациялари иттифоқи (УЕФА) Чемпионлар Лигаси, Европа Лигаси ва Конференсиялар Лигасининг асосий босқичларида сариқ карточкалар ҳисобига оид янги тартибни эълон қилди.
Янги қоидага кўра, Европа кубокларининг гуруҳ босқичида футболчилар ва жамоаларнинг расмий вакиллари тўртта сариқ карточка олганидан сўнг (четлатишга сабаб бўлмаган ҳолда) бир ўйинга дисквалификация қилинади. Шундан сўнг, дисквалификация ҳар бир кейинги жуфт сариқ карточкадан – яъни олтинчи, саккизинчи ва ундан кейинги жуфт огоҳлантиришлардан кейин қўлланилади.
Европа кубокларининг саралаш босқичида эса аввалги тартиб сақланиб қолади. Унга кўра, четлатишга олиб келмаган учта сариқ карточка тўплаган футболчи ёки расмий шахс бир ўйинга дисквалификация қилинади. Кейинчалик эса дисквалификация ҳар бир навбатдаги тоқ сариқ карточкадан сўнг кучга киради.
УЕФА ушбу ўзгаришларни 2024/25-йилги мавсумдан кучга кирган Европа кубоклари форматидаги ислоҳотлар билан изоҳлади. Чемпионлар Лигаси ва Европа Лигасининг асосий босқичидаги ўйинлар сони олтитадан саккизтага оширилгани сабабли, футболчилар сариқ карточкалар жамғариши оқибатида тез-тез дисквалификацияга учрай бошлаган. Янги қоидалар ўйинлар сони ва рухсат этилган огоҳлантиришлар ўртасидаги мувозанатни сақлаш мақсадида жорий этилди.
Шунингдек, мазкур тартиб Конференсиялар Лигасида ҳам амал қилади. Гарчи ушбу турнирнинг асосий босқичи аввалгидек олтита ўйиндан иборат бўлса-да, қишки трансфер ойнасида футболчиларнинг турли Европа кубокларида иштирок этаётган клублар ўртасида ўтиши эҳтимоли ҳисобга олиниб, ягона тизимни қўллашга қарор қилинган.