УЕФА Инфантинони “тахтдан ағдариш” фикридан воз кечди — ББС

УЕФА Инфантинони лавозимидан четлатиш фикридан қайтди — ББС

Европа футбол ассоциациялари иттифоқи (УЕФА) ҳозирги ФИФА президенти Жанни Инфантинони лавозимидан озод этишни режалаштирмаяпти. Бу ҳақда ББС хабар берди.

Манбага кўра, раҳбарни ишдан бўшатиш учун ФИФАга аъзо ташкилотларнинг тўртдан уч қисми, яъни 159 та давлат қарши овоз бериши лозим. Ҳозирги вазиятда бундай миқдордаги овозни тўплаш имконсиз деб ҳисобланмоқда. Шу сабабли, УЕФА энди асосий эътиборни 2027-йилда бўлиб ўтадиган ФИФА президентлик сайловларига қаратади. Улар ушбу сайловда Инфантинони мағлуб эта оладиган ва барча европаликларга бирдек маъқул келадиган ягона номзодни изламоқда. Сайловда иштирок этиш учун аризалар жорий йилнинг 18-ноябрига қадар топширилиши керак. Сайловнинг ўзи эса 2027-йил март ойида Марокашда ўтказилади.

Июл ойида Инфантино футбол бўйича барча йирик мусобақаларни ягона марказдан назорат қиладиган алоҳида компания ташкил этиш ниятида эканлигини маълум қилган эди. Унинг режасига кўра, бу лойиҳа орқали ташкилотлар тахминан 4,2 миллиард доллар даромад олиши керак эди.

Бироқ бу таклиф бутун дунё футбол ҳамжамиятининг кескин норозилигига сабаб бўлди. Осиё, Европа, Шимолий ва Жанубий Америка қитъаларининг футбол ташкилотлари Инфантинонинг бу ғоясини бутунлай рад этди. Ҳатто УЕФА, агар ФИФА бу лойиҳадан воз кечмаса, унинг мусобақаларида умуман иштирок этмаслигини билдирди.

Тҳе Телеграпҳ нашрининг ёзишича, воқеалар бошланишидан олдин Европадаги 55 та давлатнинг 52 таси (фақат Германия, Руминия ва Норвегия рози бўлмаганди) Инфантинони қўллаб-қувватлаб турган эди. Бироқ, можаро юзага келгач, Уелс биринчи бўлиб Инфантинони энди қўллаб-қувватламаслигини эълон қилди. Кейинчалик бошқа давлатлар ҳам ФИФАнинг амалдаги раҳбарига ишончсизлик билдирди.

Шунга қарамай, ҳозирда Африка футбол конфедерацияси, Аргентина ва бошқа бир қатор давлатлар ҳали ҳам Инфантино ғояларини қўллаб-қувватлашда давом этмоқда.