Туркманистон хорижликлар учун электрон виза ва онлайн рўйхатдан ўтишни йўлга қўйди
Электрон виза тизими ёрдамида хорижликлар мамлакатга кириш рухсатномасини олиш учун ҳужжатларни интернет орқали юбориши мумкин.
Туркманистон хорижликлар учун электрон виза ва онлайн рўйхатдан ўтишни ишга туширди
Туркманистон Давлат миграция хизмати (ДМХ) электрон виза тизими ҳамда чет эл фуқароларини онлайн рўйхатдан ўтказиш порталини ишга туширди.
Давлат миграция хизматида янги рақамли хизматлар тақдимоти ўтказилди. Тадбирда Туркманистонда аккредитациядан ўтган хорижий дипломатик ваколатхоналар раҳбарлари қатнашди. Туркманистоннинг хориждаги элчилари эса учрашувга видеоалоқа орқали уланди.
Электрон виза тизими migration.gov.тм портали негизида ишлайди. У орқали хорижликлар мамлакатга кириш рухсатномасини олиш учун ҳужжатларни интернет орқали юбориши мумкин. Миграция хизматининг расмий портали идоранинг алоҳида рақамли хизмати сифатида фаолият юритади.
Шунингдек, хорижий фуқароларни онлайн рўйхатдан ўтказиш учун мўлжалланган ргстр.migration.gov.тм сайти ҳам ишга туширилди. Бу платформа орқали сайёҳлар, тадбиркорлар ва дипломатлар миграция ҳисобига қўйиш учун ҳужжатларни топширишлари мумкин.
Расмийлар миграция тартиб-таомилларини электрон шаклга ўтказиш ҳужжатларни расмийлаштириш муддатини қисқартириши ва қоғозбозликни камайтиришини таъкидламоқда.
Электрон виза жорий этилишидан олдин Туркманистонга туристик сафар қилиш учун хорижликлар одатда қабул қилувчи томон ёки туроператор орқали олдиндан таклифнома олиши, кейин эса виза расмийлаштириши керак эди. 2025-йил апрел ойида «Миграция тўғрисида»ги қонунга электрон виза олиш учун таклифнома талаб қилинмайдиган ўзгартиришлар киритилди. Шу билан бирга, расмийлар ҳозирча янги тизимнинг ишлаш шартлари, жумладан, э-Виса нархи, кўриб чиқиш муддати ва зарур ҳужжатларнинг тўлиқ рўйхатини очиқ эълон қилгани йўқ.