Туркия Ойга учириш учун ўзининг илк фазовий кемасини ишлаб чиқди
Туркия Ойга юбориш учун ўзининг биринчи фазовий кемасини тайёрлади
Туркия Ойга амалга ошириладиган илк фазовий миссия учун мўлжалланган коинот кемасининг ишлаб чиқариш, йиғиш ва интеграция жараёнларини якунлади. Бу ҳақда 14-сентябр куни мамлакат саноат ва технологиялар вазири Меҳмет Фотиҳ Кажир маълум қилди.
Вазир матбуот анжуманида аппарат тизимли синовлардан ўтиши учун Туркия аерокосмик саноати космик синов марказига жўнатилганини айтди. Туркия ўз муҳандислик салоҳияти билан Ойда миссия бажарадиган дунёдаги тўққизинчи, мусулмон давлатлари орасида эса биринчи мамлакат бўлишни мақсад қилган.
Тахминан 3,5 тонна оғирликдаги коинот кемасини 2027-йилнинг дастлабки ойларида учириш режалаштирилган. У икки ойлик парвоздан кейин Ой сиртидан 100 километр баландликдаги орбитага чиқади. Аппарат аввал камида уч ой ишлаши керак. Унинг хизмат муддати кўрсаткичларга қараб 18 ойгача узайтирилиши мумкин.
Миссия давомида кемада Қуёш шамолларининг Ой сиртига таъсири ва сув ҳосил бўлиш механизмлари ўрганилади. Шунингдек, Ойнинг магнит майдони ва иссиқлик хусусиятлари таҳлил қилинади. Маҳаллий ускуналар ёрдамида радиация ўлчовлари ҳам амалга оширилади.
Коинот кемасининг 80 фоиздан ортиқ қисми миллий ресурслар ва маҳаллий технологиялар асосида ишлаб чиқилди. Бунда Туркиянинг Имесе ҳамда Тüрксат 6А сунъий йўлдош лойиҳаларида тўпланган тажрибадан фойдаланилди.
Энди аппарат коинотдаги оғир шароитларга чидамлилигини текшириш учун вакуум, иссиқлик ва структуравий синовлардан ўтказилади. Текширувлар тугагач, коинот кемаси Анқарадаги янги мажмуага кўчирилади. Якуний назоратдан сўнг у учириш учун АҚШдаги Кеннеди коинот марказига юборилади.