Тупак Шакур ўлдирилиши юзасидан 30 йил ўтиб ҳукм ўқилди
Жиноятчилар тўдасининг собиқ раҳбари Дуейн «Киффи Ди» Девис умрбод қамоқ жазосини олди. Машҳур репер 1996-йилда отиб кетилганди ва кейинги ўнлаб йиллар мобайнида АҚШдаги энг шов-шувли очилмаган ишлардан бири бўлиб қолганди. Кейин эса Дуейн Девис интервюлари ва мемуарлари орқали ўзини «сотиб қўяди».
Тупак Шакур ўлдирилиши бўйича 30 йил ўтиб ҳукм чиқарилди
Лас-Вегас суди жиноят оламида «Киффи Ди» номи билан танилган 63 ёшли Дуейн Девисни 1996-йилда репер Тупак Шакур ўлдирилгани ҳақидаги иш юзасидан умрбод қамоқ жазосига ҳукм қилди.
Август охирида суд уни шу ишда айбдор деб топган эди.
Ҳукмга кўра, Девис 40 йилгача муддатидан олдин шартли озодликка чиқишни сўраш ҳуқуқига эга бўлмайди.
«Уч йил мобайнида мен сиздан бир гапнинг турли вариантларини эшитиб келдим: „Ҳа, мен бунга алоқадор эдим. Лекин энди мен бошқа одамман. Ўтмишни ортда қолдирдим. „Комптон“ни тарк этдим. Энди мен бобоман“», – деди судя Карли Кирни ҳукмни ўқиб эшиттирар экан.
«Сиз бировни оиласидан тортиб олишга ҳақли эмасдингиз. Уни ҳаётдан, бутун келажагидан маҳрум қилиб, кейин ҳеч нарса бўлмагандек, шунчаки кетишга ҳаққингиз йўқ», – деди у айбланувчига мурожаат қилиб.
Тупак Шакур 1990-йилларнинг энг машҳур реперларидан бири эди. У 1996-йил 7-сентабр куни, 25 ёшида қотиллик қурбони бўлган. Ўша пайтда у мусиқа магнати Мерион «Шуг» Найт билан бирга унинг машинасида тунги клубга кетаётганида ён томондан ўтаётган «Кадиллак»дан туриб ўққа тутилган. 13-сентабр куни шифохонада вафот этган, «Шуг» эса омон қолган.
Бу қотиллик кўп йиллар давомида АҚШдаги энг шов-шувли очилмаган ишлардан бири бўлиб қолди. Ҳуқуқ-тартибот идоралари бошидан бу қотиллик рақобатчи тўдалар ўртасидаги жиноий тортишув натижаси бўлганини тахмин қилган, бироқ ўнлаб йиллар давомида кимнидир айблаш учун етарли далиллар топилмаган.
Дуейн Девис Срипс тўдасининг Комптондаги (Лос-Анжелеснинг чекка ҳудуди) бўлими — Соутҳ Сиде Сомптон Срипс — нинг собиқ бошлиғи бўлган. Тупакка продюсерлик қилган «Шуг» Найт эса ушбу жиноий тўданинг рақиби ҳисобланган Моб Пиру Блоодс гуруҳига алоқадор эди.
Девис 1996-йилдаёқ Тупакнинг ўлдирилиши бўйича ишда сўроқ қилинган Орландо Андерсоннинг амакиси эди: полициячилар Андерсонни қотилликда гумон қилган, чунки воқеадан бир неча соат олдин клублардан бирида у ва Тупак ўртасида зиддият юзага келиб, репернинг тан соқчиси уни калтаклаган эди. Андерсонга расмий айблов қўйилмайди, у 1998-йилда отишмада ҳалок бўлади.