“Троя” филмидаги кўзга ташланмайдиган кинохатолар: Ахиллеснинг эмлаш изи ва Париснинг тугамайдиган ўқлари
Волфганг Петерсеннинг 2004-йилда катта шов-шувга сабаб бўлган “Троя” тарихий жангари филми уч соатдан ортиқ давом этиб, улкан декорациялари, шиддатли жанг саҳналари ва юлдузли актёрлар таркиби билан томошабинларни ҳайратга солган. Филм кассада муваффақият қозонган бўлса-да, танқидчилар унинг драматик жиҳатини суст деб баҳолаб, турли хил фикрларни билдиришган.
Юқори буджетга қарамай, филмда тарихий ноаниқликлар ва кинохатолар кўп учрайди. Айниқса, либосларнинг ўша даврга тўлиқ мос келмаслиги кўп танқидга сабаб бўлган. Вақт ўтиши билан томошабинлар яна кўплаб майда хатоларни ҳам пайқай бошладилар.
**Бред Питтнинг эмлаш изи**
Филмнинг бош қаҳрамони, мирмидонлар сардори Ахиллесни ўша пайтда ижодининг энг чўққисида бўлган Бред Питт гавдалантирган.
Бироқ актёрнинг чап елкасидаги эмлаш изи бир қанча саҳналарда яққол кўриниб қолади. Масалан, Брисеида билан чодирдаги суҳбат саҳнасида бу из кичик кесилган яра ёрдамида яширилган бўлса, Ахиллеснинг жасади куйдириладиган эпизодда эса бутунлай йўқолиб қолади. Тахминларга кўра, бу саҳнада актёр ўрнига унга ўхшаш қўғирчоқдан фойдаланилган.
Яна бир хато Ахиллеснинг узун сочлари билан боғлиқ. Троя қирғоғига яқинлашаётган кемада у аскарларига мурожаат қилаётган пайтда сочлари кеманинг ҳаракатига тескари томонга ҳилпирайди. Аслида эса кемалар елкан ёрдамида айнан шамол эсаётган томонга қарши ҳаракатлана олмас эди.
**Замонавий буюмлар ҳам кадрга тушиб қолган**
Троя қирғоғига тушишдан олдинги саҳналардан бирида мирмидон Эвдор тарихий кўринишдаги зирҳ кийган бўлса-да, оёқ кийимининг таг қисми замонавий поябзаллардагидек чуқур протекторли эканини кўриш мумкин.
Қирғоққа тушиш саҳнасида яна бир аскар ўқ еб йиқилганда дубулғаси билан бирга сунъий сочи ҳам тушиб кетади.
Филм давомида ёритиш ускуналари акс этган тасвирлар ва суратга олиш техникасининг сояси ҳам бир неча бор кўринади. Масалан, Ахиллес ва Гектор жанг қилаётган пайтда Гектор найзасини йўқотгач, қум устида камера кранининг В ҳарфига ўхшаш сояси яққол кўринади.
**Қуроллар билан боғлиқ хатолар**
Троя деворлари ёнидаги жанглардан бирида Гектор ортга қайтаётганда йўлида юнон аскарларигагина хос бўлган ўроқсимон қалқон кўтарган жангчи пайдо бўлади. Унинг атрофида ҳам юнон зирҳини кийган яна бир неча жангчини кўриш мумкин. Эҳтимол, статистлар тасодифан нотўғри гуруҳга қўшилиб қолган.
Ахиллес ва Гектор дуелида ҳам эътибордан четда қолмаган хато бор. Ахиллес қалқони билан Гекторнинг найзасини синдирганида ёғоч нотекис синади. Аммо кейинчалик найзанинг бўлаги Гекторга санчилганда у мутлақо текис кесилгандек кўринади.
**Париснинг “чексиз” ўқлари**
Филм якунида Троя ёнаётган пайтда Парис Ахиллес ва Брисеидани кўриб, уларга қарата ўқ уза бошлайди.
Қизиғи, у илк кадрда садоқида атиги учта ўқ билан кўринади. Шунга қарамай, Ахиллесга бешта ўқ отади, кейин эса олтинчи ўқни камонга қўяди. Бунинг устига, садоқда яна иккита ўқ қолганини ҳам кўриш мумкин.
Бу эса “Троя”даги энг машҳур ва кулгили кинохатолардан бири сифатида тилга олинади.