Трампнинг улкан арка қуриш режалари олдинга силжимоқда
Баландлиги 250 фут бўлган аркани қуриш ва ундан ҳарбий мақсадларда фойдаланишга қаршилик кучаймоқда, Демократик партия вакилларидан бири Трампнинг режаларини «аҳмоқона» деб қоралади.
Трампнинг улкан арка қуриш режаси олдинга силжимоқда
АҚШ Президенти Дональд Трампнинг улкан арка қуриш режалари, федерал маслаҳат кенгаши 250 футлик (76 метр) иншоотнинг яқин атрофдаги тарихий жойларга эҳтимолий таъсирини қандай ҳал қилиш бўйича муҳокамаларни якунлаганидан сўнг, олдинга силжиётгандек кўринмоқда.
Трамп томонидан тайинланган аъзолардан иборат кенгаш пайшанба куни лойиҳа бўйича талаб қилинадиган маслаҳатлашувларни ёпаётганини маълум қилди ва буни Вашингтон ҳамда Виржиния штатининг тарихий меросни сақлаш бўйича расмийлари зарарни камайтириш режаларини маъқуллашдан бош тортгани билан изоҳлади.
Қаршиликлар кучайиб бораётганига қарамай, қурилиш ишлари шу ойда бошланиши кутилаётган эди.
Жума куни Демократик партиядан сенатор Тэмми Дакворт аркадан мудофаа мақсадларида фойдаланиш таклифларини «аҳмоқона» деб қоралади ва уни «Трампнинг навбатдаги худбинлик лойиҳаси» деб таърифлади.
Шу ҳафта бошида Трамп таклиф қилинаётган «Зафар аркаси» ҳарбий техникани сақлаш жойи бўлиб ҳам хизмат қилишини, унинг томи ва майдонидан мерганлар (снайперлар) ва дронларни ишга тушириш имконияти мавжуд бўлишини айтган эди.
Пентагон ва Федерал авиация маъмуриятига (FAA) йўллаган мактубида Дакворт улар «бу аҳмоқона режани рад этишлари ва бунинг ўрнига ҳаво ҳудуди хавфсизлигини оширишга эътибор қаратишлари керак»лигини таъкидлади.
Арка Виржиниядаги Арлингтон миллий қабристонининг шундоққина ташқарисида ва 2025 йилда ҳарбий вертолёт ва тижорат самолёти ўртасида фожиали тўқнашув юз берган Рональд Рейган номидаги Вашингтон миллий аэропортидан тахминан 4 миля (6 км) узоқликда жойлашган ҳудудда қурилиши режалаштирилган.
«Америка халқи Трампнинг гавжум яқинлашиш йўли бўйлаб 250 футлик (72 метр) иншоотни жойлаштириш ҳақидаги хавфли режасига, айниқса, у аркада мерганларни жойлаштириш ва дронларни учириш режаларини амалга оширадиган бўлса, томошабин бўлиб тура олмайди», деб ёзди Дакворт BBC’нинг АҚШдаги ҳамкори CBS News томонидан қўлга киритилган мактубида.
Бироқ, FAA ўтган ҳафта ушбу улкан иншоот аэропортга қўнаётган ёки ундан учаётган самолётлар учун хавф туғдирмаслигини маълум қилди.
Пайшанба куни Тарихий меросни сақлаш бўйича маслаҳат кенгаши (у ҳам Трамп томонидан тайинланганлар томонидан бошқарилади) маҳаллий расмийлар билан иншоотнинг ҳудуддаги 42 та тарихий объектга қандай таъсир қилиши мумкинлиги бўйича талаб қилинадиган маслаҳатлашувларни якунлаётганини билдирди.
Ўз баёнотида кенгаш федерал диққатга сазовор жойларни бошқарадиган Миллий парклар хизмати ушбу объектларга етказилиши мумкин бўлган зарарни камайтириш режасини таклиф қилганини, бироқ маҳаллий тарихий меросни сақлаш ходимлари «Зафар аркасининг мақсади ва зарурати юзасидан хавотир билдиришганини» айтди. Улар, шунингдек, хизмат эҳтимолий зарарларни тўғри аниқлагани ва уларга қарши курашиш учун етарли чора-тадбирларни режалаштирганига шубҳа қилишди.
Федерал ва штат расмийлари лойиҳанинг зарарни камайтириш режалари бўйича келишишга мажбур эмаслар ва агар икки томон консенсусга эриша олмаса, маслаҳатлашувлар тўхтатилиши мумкин. Кенгаш келаси ой бошида ушбу жараён бўйича якуний ҳисоботни тақдим этишни режалаштирмоқда.
Шу билан бирга, Виржиниядан Демократ конгрессмен Дон Бейер арка қурилиши керак бўлган жойда қазиш ишлари бошлаб юборилганини айтмоқда.
Аркага қарши конгресс мухолифатига раҳбарлик қилаётган Бейер пайшанба куни ушбу ҳудудга ташриф буюрганида ишчиларнинг оғир техникадан фойдаланаётганини кўрганини ва улар унга «тупроқ таркибини баҳолаш учун археологик ишлар олиб боришаётганини» айтишганини билдирди.
Бу «жуда ташвишли», деди Бейер, айниқса, маъмурият иш бошланишидан 48 соат олдин хабар бериши талаб қилинишини ҳисобга олсак.
«Маъмурият ушбу лойиҳанинг оқибатларини тушуниш учун зарур бўлган асосий ишларни ҳали бажармаган бўлса-да, ҳудуддаги фаолиятни олдинга сураётганга ўхшайди», деб ёзди Бейер.
Шу йил бошида эълон қилинган дизайн лойиҳаси арка тепасида олтин рангли, қанотли Озодлик маъбудаси, унинг икки томонида иккита олтин бургут ва иншоотнинг ҳар икки томонида олтин ҳарфлар билан ёзилган «One Nation Under God» (Худо паноҳидаги ягона миллат) ва «Liberty and Justice for All» (Барча учун озодлик ва адолат) иборалари тасвирланганини кўрсатади.