Трампнинг матбуот котиби ишдан кетмоқда

Трампнинг матбуот котиби лавозимидан кетмоқда

АҚШ президенти Доналд Трампнинг матбуот котиби Керолайн Левитт ўз лавозимини тарк этишини эълон қилди. Бу ҳақда у Х ижтимоий тармоғида маълум қилди.

Левиттнинг сўзларига кўра, у бу қарорни икки фарзандига кўпроқ вақт ажратиш мақсадида қабул қилган. У май ойида иккинчи фарзанди, қизи Вивиананини дунёга келтирган эди ва қисқа таътилдан сўнг ишга қайтган эди. Шунингдек, Левиттнинг икки ёшли ўғли ҳам бор.

"Қизим туғилгач, Оқ уйга қайтганимда, агар вақт, энергия ва эътиборимни матбуот котиби лавозими талаб этадиган даражада ишга бағишласам, икки нафар кичик фарзандимга муносиб она бўла олмаслигимни бутун қалбим билан ҳис қилдим", деб ёзди Левитт.

У АҚШ президентига "алоҳида ишонч — унинг номидан нутқ сўзлаш имконияти" учун миннатдорлик билдирди. Трамп ҳам унга Оқ уй матбуот котиби сифатидаги фаолияти учун миннатдорлик билдириб, уни Оқ уйдаги "ҳақиқий етакчи" деб атади. АҚШ президенти Левиттнинг ўрнига ким келишини ҳозирча маълум қилмади.

Ҳозирда 28 ёшда бўлган Левитт Оқ уйнинг энг ёш матбуот котиби ҳисобланади. У, шунингдек, 2024-йилда Трампнинг сайловолди кампанияси матбуот котиби бўлган ва МАГА (Маке Америса Греат Агаин — "Американи яна буюк қиламиз") ҳаракатининг энг кўзга кўринган тарафдорларидан биридир.