Трамп ва Маск 100 миллион доллар сабабли ярашиб олди - ОАВ
Маск маблағларни муҳим штатлардаги сайловчиларни сафарбар қилиш кампаниясига йўналтирмоқчи, бироқ сиёсатга қайтишни режалаштирмаяпти. Шу билан бирга, томонлар мунтазам алоқаларни сақлаб қолган ва сунъий интеллект, Хитой ҳамда халқаро воқеаларни муҳокама қилмоқда.
Трамп ва Маск 100 миллион доллар туфайли ярашди – ОАВ
Миллиардер Илон Маск ва АҚШ президенти Доналд Трамп ўтган ёздаги оммавий келишмовчиликдан сўнг муносабатларини тиклади. Бу яқинлашувга Оқ уй вакиллари билан музокаралар, умумий танишлар ва бир нечта учрашувлар, жумладан, консерватив фаол Чарли Киркнинг вафоти муносабати билан бўлиб ўтган учрашув ҳам ёрдам берди. Бу ҳақда Тҳе Валл Стреет Жоурнал ўз манбаларига таяниб хабар бермоқда.
Май ойида Трампнинг Хитойга сафари чоғида Маск яна президентга Аир Форсе Оне самолёти бортида ҳамроҳлик қилди. Манбаларнинг сўзларига кўра, улар дўстона суҳбатлашган. Маск оралиқ сайловларда республикачиларни қўллаб-қувватлашини ва бунга камида 100 миллион доллар сарфлаш ниятида эканини маълум қилган. Газетанинг аниқлик киритишича, ушбу сумма сайловчиларнинг фаоллигини оширишга қаратилган тадбирлар учун мўлжалланган. Тадбиркорнинг ўзи эса сиёсатда камроқ иштирок этиш ниятидалигини билдирган.
Ўтган йилнинг июн ойидаги можародан сўнг вице-президент Жей Ди Венс ва Оқ уй аппарати раҳбари Сюзи Уайлз Маск билан боғланди, кўп ўтмай тадбиркор Трампга қўнғироқ қилиб, айрим баёнотлари учун афсусда эканлигини билдирди. Можарога маъмуриятнинг солиқ тўғрисидаги қонун лойиҳаси юзасидан келиб чиққан келишмовчиликлар сабаб бўлган.
Ҳозир қайта яқинлашиб олган Трамп ва Маск тахминан ойда бир марта мулоқот қилиб, сунъий интеллект, Хитой ва халқаро воқеаларни муҳокама қилмоқда. Айни пайтда, Трамп исми ошкор этилмаган ёрдамчиларининг сўзларига кўра, уларнинг муносабатлари энди аввалгидек яқин бўлмаслигига ишонади.
Трамп ва Маск ўртасидаги зиддият 2025-йил ёзида Оқ уй Маск қўллаб-қувватлаган Жаред Айзекманнинг НАСА раҳбари лавозимига номзодини қайтариб олиш тўғрисидаги қароридан сўнг кескинлашди. Кейинроқ Маск Трамп илгари сураётган давлат харажатлари ва солиқлар тўғрисидаги қонун лойиҳасини танқид қилди, шундан сўнг томонлар бир-бирини оммавий айблашга ўтди. Хусусан, Трамп Маскнинг компанияларига ажратиладиган давлат субсидиялари ва шартномаларини тўхтатиш билан таҳдид қилди.
Кейинроқ Маск президентни танқид қилган айрим постларини ўчириб ташлади ва баъзи фикрлари «ҳаддан ташқари» бўлганини тан олди. Трамп бу қадамни «жуда ёқимли» деб атади ва кейинроқ, можаро пайтида Маск «ўзини бироз ғалати тутган» бўлса-да, уни ҳамон дўсти деб билишини айтди.
Трамп ва Маскнинг яраштиришда АҚШ вице-президенти Жей Ди Венс рол ўйнагани ҳақида ВП нашри ҳам ёзган эди. Газета маълумотларига кўра, у Маскни президент билан жанжалдан сўнг эълон қилган ўз партиясини тузиш фикридан қайтарган. Ярашувдан сўнг Маск ноябр ойида Оқ уйда Саудия Арабистони валиаҳд шаҳзодаси Муҳаммад бин Салмон шарафига уюштирилган кечки овқатда яна кўриниш берди.