Трамп Украинада янги президент кўрмоқчи. У Россия томонга ўтдими?
«Украина президентини алмаштириши керак!». Президент Трамп журналистлар билан навбатдаги учрашув чоғида шундай деди. Энди бемалол айцак бўлади: Трамп уруш масаласида Россия томонга ўтди. Энди Россия яна ўзини ғолиб ҳисобламоқда. Шундоқ ҳам оғир қиш олдидан Украина ниҳоятда қийин аҳволда қолди. Америка ва Россия амалда украинларга босим ўтказиш йўлида бирлашди.
Трамп Украинада янги президентни кўришни истаяпти. У Россия тарафга ўтдими?
«Менимча, Украина келиша оладиган янги етакчини танлаши керак. Унда бир неча бор келишиш имконияти бор эди, лекин бундай қилмади. Биз Россия билан билганингни қил, лекин нефт заводларига тегма, бу глобал муаммо келтириб чиқаради, дедик. У бизнинг фермерлар ва чорвадорларимиз учун муаммо туғдирмоқда. «Дизелга зарба берма», дедик, у эса бориб айнан дизелни уряпти». Ана шунақа, Зеленский бир ухлаб тургач америкалик чорвадорлар ва фермерларнинг «биринчи рақамли душмани»га айланди.
Трамп президентликка келиши биланоқ Киевда хавотир билан кутиб олинганди, чунки унинг Москва билан муносабатлари сир эмасди. Трамп айнан Зеленскийга босим қилгани сабаб импичментга сал қолган эди. Киев хавотир олгандек бўлди, Трамп келиши билан урушни бошлашда Украинанинг ўзини айблади. Зеленскийга қандай муносабатда эканини яшира олмади ва ўтган йил февралида улар орасидаги адоват бутун дунё кўз ўнгида портлади. Трамп кек сақлайдиган одам, шу боис ҳозир яна бажонидил Зеленский орқали Украинага босим ўтказиш кампаниясини бошлаб юборди.
Трамп ва унинг маъмуриятидаги мулозимлар аввал ҳам «Украинада сайлов ўтказиш кераклигини» айтишган, ўшанда ҳам бу масала Россия томонининг баёнотларидан кейин кўтарилганди. Аммо Киев уруш пайтида сайлов ўтказиб бўлмаслигини тушунтиргач, бу мавзу қайта очилмай қолганди.
Трампнинг яна «Украинага янги лидер керак» деб қолиши ҳам тушунарли. У америкаликларни хавотирга солаётган дизел нархини тушириш учун Украинадан Россия нефт заводларига зарба беришни тўхтатишни сўради. Киев эса русларнинг нефт иншоотларини уришда давом этди. Кейин Трамп «Америка президентининг гапини икки қиладиган сенми ҳали», деб яна Россия томонига ўтди. Америка учун «тупканинг тагидаги» бу давлатдан «солярка» сотиб олишни бошлади.
Энди рус танкерлари Европа сувликларидан бемалол сузиб ўтиб, «Титаник» маршрути бўйлаб бутун Атлантикани кечиб, Америкага дизел олиб боради. Иқтисодчи бўлмаган одам ҳам америкалик фермерлар тракторни маккапоя ўришга далага чиқариши учун бунча узоқдан дизел сотиб олиш шарт эмаслигини билади. Ахир Венесуела нефти энди Вашингтон қўлида, Америка ҳам кўп нефт қазиб олади, жуда бўлмаса, Канада бор. Лекин Трамп айнан Украина президентига «АҚШ президентига йўқ дейишнинг оқибати қандай бўлишини кўрсатиб қўйиш учун» Россиядан «солярка» сотиб олишга буйруқ берди.
Кеча президент Трамп Трутҳ Сосиалъдаги саҳифасида «Россия ва Украина энергетик сулҳга келишгани» ҳақида эълон қилди. Қизиғи, бу маълумот Россия томонидан ҳам, Украина томонидан ҳам тасдиқланмади. Зеленский НАТО форумида онлайн нутқ сўзлар экан, Трампнинг бу постидан ҳайрон қолгани, у эълон қилинишидан кўп ўтмай Россия Харкивдаги электростансияга зарба берганини айтди. Бу ҳақда гапирар экан, Россияни тролл қилишга ҳам улгурди. «Путин Трутҳ Сосиал'ни ўқимаслиги аниқ, унинг Шаҳед'лари бошқача инструксия бўйича ҳаракат қилади».