Трамп Украинада Старшиелд ишини чеклашга буйруқ берганини рад этди
АҚШ президенти Доналд Трамп Украина фойдаланаётган Старлинкънинг ҳарбий хизматлар пакети - Старшиелд ишини чеклаш бўйича кўрсатма бермаганини айтди. У Илон Маск ҳам бундай қарор қабул қилган деб ўйламаслигини билдирди. Бироқ чекловлар ташаббускори ҳақида халқаро ОАВ тарқатган маълумотлар бир-бирига зид.
Трамп Украинада Старшиелд ишини чеклашга буйруқ берганини инкор этди
«Буни кимдир қилганми, билмайман. Бу мен эмас эдим», - деди АҚШ президенти. У чекловлар ҳақида эрталабки янгиликлардан хабар топганини, ўзи билган маълумотларга кўра эса тизим аввалгидек ишлаётганини айтди.
Илон Маск 14-октабр куни Украинанинг собиқ мудофаа вазири Михаил Федоровнинг Х ижтимоий тармоғидаги постига жавобан, Старшиелд ишини чеклашга оид қарорларни АҚШ ҳарбийлари, якуний ҳисобда эса президент қабул қилишини маълум қилган. Федоров унга тизим фаолияти босқичма-босқич тикланаётгани учун миннатдорлик билдирган эди.
Тҳе Телеграпҳ газетаси 16-октабрда тўрт манбага таянган ҳолда, Украинада Старшиелд имкониятларини чеклаш ғоясини Трампга Маск таклиф қилганини ёзди. Манбалардан бирининг иддао қилишича, президент бу таклифни маъқуллаган ва шундан сўнг Пентагон чекловларни жорий этган.
Газета маълумотига кўра, тизимдан ҳаракатда фойдаланиш учун тезлик чегараси тахминан соатига 160 километрни ташкил этади. Бу интернетнинг маълумот узатиш тезлиги эмас, терминал ўрнатилган қурилманинг ҳаракат тезлигига оид чекловдир. Нашр бундай чегара тез учувчи Россия реактив дронлари ва ракеталарини тутиб қолишда қўлланадиган аппаратлар имкониятини жиддий чеклашини қайд этган.
Бироқ қарор ким томонидан қабул қилингани ҳақидаги хабарлар турлича. Реутерс манбалари кўрсатма Оқ уйдан келганини айтган бўлса, АФП суҳбатлашган америкалик мансабдор Трамп бундай буйруқ бермаганини билдирган.
Украина Мудофаа вазирлиги маълумотига кўра, Старшиелд ишидаги чекловлар 14-октабрга ўтар кечаси пайдо бўлиб, учувчисиз тизимлар фаолияти ва логистикани қийинлаштирган. 15-октабрда эса вазирлик дала шароитида терминаллар иши тикланганини хабар қилган.
ДВ билан исмини ошкор қилмаслик шартида суҳбатлашган юқори мартабали украиналик мансабдор Киев чекловлар бўйича АҚШдан изоҳ олмаганини айтган. Унинг сўзларига кўра, Украина бу ҳолатни кейинчалик яна чекловлар жорий этилиши мумкинлиги ҳақидаги сигнал сифатида баҳоламоқда.