Трамп у режалаштирган зафар аркаси ўқ-дориларни сақлаш учун ҳарбий комплекс вазифасини ҳам бажаришини айтди

Трамп у режалаштирган зафар аркаси ўқ-дориларни сақлаш учун ҳарбий мажмуа бўлиб ҳам хизмат қилишини айтди

АҚШ Президенти Дональд Трамп у таклиф қилган зафар аркаси ҳарбий техникаларни сақлаш мажмуаси сифатида ҳам фаолият юритишини, у ерда мерганлар (снайперлар) ва дронларни жойлаштириш имконияти бўлишини айтди.

Якшанба куни эрталаб эълон қилган постида Трамп АҚШ ҳарбийларининг «қатъий талаби» ва «миллий хавфсизлик мақсадларида» режаларни қайта кўриб чиқаётганини маълум қилди.

«Юқори тоифали» ҳарбий мажмуа ва арка «том ва майдон ҳудудларида кўп сонли дронлар, шунингдек, мерганларни жойлаштиради, сақлайди ва улардан тезкор фойдаланиш имкониятига эга бўлади, бундан ташқари, омборда катта миқдордаги мерганлик ўқ-дориларини сақлайди», деди у.

У қурилиш режалари ёки муддатлари ҳақида батафсил маълумот бермади ва ушбу объект учун унга бирор бир қўшимча рухсат талаб қилиниши ёки қилинмаслиги номаълум.

«Дунёнинг ҳеч бир жойида бундай иншоот бўлмайди», деб ёзди Трамп ўзининг Truth Social платформасида. У қайси шаҳарларни назарда тутганини айтмасдан, «59 та энг йирик шаҳар ва пойтахтлар» орасида Вашингтон «дунёда зафар аркаси бўлмаган ягона шаҳар» эканини қўшимча қилди.

Трампнинг Вашингтондан Потомак дарёсининг нариги томонида, Арлингтон миллий қабристонининг шундоққина ташқарисида қурилиши режалаштирилган 250 футлик (76 метр) аркасининг қурилиши шу ойда бошланиши кутилаётган эди.

Шу йил бошидаги дизайн лойиҳасида арка тепасида олтин рангли, қанотли Озодлик маъбудаси тасвирланган бўлиб, унинг икки томонида иккита олтин бургут жойлашган, иншоотнинг ҳар икки томонида эса олтин ҳарфлар билан «Худо паноҳидаги ягона миллат» ва «Барча учун озодлик ва адолат» деган иборалар ёзилган. У пойдеворидан олтин рангли маъбуда ҳайкалининг тепасигача 250 фут (76 метр) баландликка кўтарилади.

Бу баландликда иншоот яқин атрофдаги 99 футлик Линкольн мемориалидан анча баланд бўлади ва Вашингтон монументи баландлигининг ярмига етади.

Арканинг шу йил бошидаги режаларида унинг тепасида иккита олтин бургут билан ўралган олтин рангли, қанотли Озодлик маъбудаси тасвирланган.

Трамп ўзининг иккинчи муддатида АҚШ пойтахти қиёфасини ўзгартириш учун бир қатор қурилиш лойиҳаларини илгари сурди, жумладан, Овал кабинетни олтин билан безатиш, тахминий қиймати 400 миллион доллар бўлган Оқ уй базм залини қуриш, Оқ уйнинг Атиргуллар боғини асфальтлаш ва Линкольн мемориалининг Акс этувчи ҳавзасини таъмирлаш.

Зафар аркаси Трамп мақсад қилган энг йирик лойиҳалардан биридир.