Трамп турли хавфлар сабаб ҳаво мудофаа тизими ҳимоясида голф ўйнамоқда
Трамп голф ўйинларини ҳаво мудофааси тизими ҳимоясида ўтказмоқда
АҚШ президенти Доналд Трамп эндиликда голф ўйнаш чоғида армиянинг ҳаво мудофааси тизими ҳимоясидан фойдаланмоқда. Билд нашрининг хабар беришича, унинг голф майдонидан олинган фотосуратларда давлат раҳбари турган жойдан бир неча метр нарида ўрнатилган "Авенгер" мажмуасини кўриш мумкин.
"Авенгер" мажмуасининг ишлашини ўндан ортиқ ҳарбий хизматчи таъминлайди. Ушбу ҳарбий техника "Стингер" ракеталари билан қуролланган бўлиб, жанговар ҳаракатлар учун мўлжалланган. Америка ОАВларининг маълумотларига кўра, бу тизим дронларнинг эҳтимолий ҳужумларидан ҳимояланиш мақсадида жойлаштирилган бўлиши мумкин.
Ушбу қўшимча хавфсизлик чоралари Трампнинг аввалроқ бир неча бор суиқасд нишонига айлангани билан боғлиқ. 2024-йил июл ойида сайловолди кампанияси давомида мерган унинг қулоғини жароҳатлаган эди. Шунингдек, кейинчалик унинг Флоридадаги голф майдонида қуролланган шахс қўлга олинган. АҚШнинг Эронга қарши уруши фонида расмийлар Теҳрон томонидан қасос олиниши мумкинлигидан ҳам хавотирда.
Яқинда Трампнинг голф клуби устидан учаётган самолётлар тўхтатилгани ҳақида хабар берилган эди. Президентнинг шахсий голф клуби жойлашган Бедминстер (Ню-Жерси штати) ҳаво ҳудудида вақтинчалик парвозлар чекланган. 9-август куни ушбу чекловга риоя қилмаган учоқларнинг йўлини тўсиш учун Ф-16 қирувчи самолётлари жалб этилган. Натижада фуқаро самолётлари хавфсиз ҳудудга кузатиб қўйилган.