Трамп сайловдан кейин Эрон билан тинчлик битими тузилишини айтди
Икки давлат вакиллари июн ойидан бери биринчи марта учрашган.
Трамп сайловдан кейин Эрон билан тинчлик битими тузилишини айтди
АҚШ президенти Доналд Трамп сешанба куни БМТ Бош Ассамблеяси сессиясида қилган чиқишида Қўшма Штатлар 3-ноябр куни бўлиб ўтадиган оралиқ сайловлардан кейин Эрон билан тинчлик шартномасини имзолаши мумкинлигини маълум қилди.
Трамп нутқида Украинадаги уруш, Куба тақдири ва Гренландия бўйича янги келишув масаласига ҳам тўхталди, шунингдек, сунъий интеллект номини ўзгартиришни таклиф қилди.
«Ўйлайманки, биз [Эрон билан] келишувни сайловдан сўнг дарҳол тузамиз, чунки улар буни тузмаслигидан маъно йўқ. Улар оралиқ сайловларда ишларим қандай кечишини кутишмоқда», – деди Трамп.
Учрашувда Вашингтондан Трампнинг махсус вакиллари Стив Уиткофф ва Жаред Кушнер, Теҳрондан эса ташқи ишлар вазири Аббос Арақчи иштирок этди. Музокаралар аввалгидек воситачилар орқали олиб борилди.
«Бугун БМТ Бош Ассамблеяси доирасида кун давомида томонлар ўртасида қатнаган вакиллар воситачилигида Эрон делегацияси билан узоқ муддатли музокаралар ўтказдик. Музокараларнинг бу раунди муваффақиятли якунланди ва умид қиламизки, улар конструктив ва истиқболли бўлади. Воситачилар ўз ишларини давом эттиради», – деб ёзди Уиткофф кейинроқ Х ижтимоий тармоғида.
Доналд Трамп БМТ минбаридан сўзлаган нутқида муҳим қарор қабул қилиши кераклигини айтди: Эронни йўқ қилиш ёки у билан келишув тузиш.
«Муҳим қарорни қабул қилишим керак. Эрон билан мамлакатни қайта қуриш ва уни ҳар қачонгидан ҳам буюкроқ қилиш имконини берадиган келишув тузиладими ёки улар бошқа одамларни ўлдира олмаслиги ва мамлакатларни вайрон қила олмаслиги учун мен Ислом Республикасини йўқ қилишим керакми?» – деган АҚШ президенти.
«Уларга омон қолишга ҳеч қандай имкон қолдирмай, келажакдаги буюкликка ва келажак авлодларга бўлган умиддан маҳрум қилган ҳолда ҳақиқий дўзахни кўрсатиш керакми? Аммо ўйлайманки, биз сайловдан сўнг дарҳол келишувга эришамиз», – дея давом этган Трамп.
Трамп дунёнинг бошқа мамлакатларини Эронга босим ўтказишни қўллаб-қувватлашга чақирди, шунингдек, АҚШ Эронга қарши уруш бошлаб, унинг ядровий қуролга эга бўлишининг олдини олганини яна бир бор таъкидлади.