Трамп Саудиянинг ҳарбий ёрдам сўрови туфайли дилеммага дуч келди
Муҳаммад бин Салмоннинг кетма-кет қўнғироқларидан сўнг президент Трамп узоқ иккиланди. Бироқ Саудия Арабистони билан биргаликда Ямандаги ҳусийларга қарши урушга қўшилмасликка қарор қилди.
Трамп Саудиянинг ҳарбий ёрдам сўрови сабабли мураккаб вазиятга тушиб қолди
АҚШ ва Исроилнинг Эронга қарши уруши давом этаётган бир пайтда, Вашингтон яна бир оғир савол билан юзлашди. Бу савол сўнгги икки ҳафтадан бери АҚШ президенти Доналд Трампни қийнаб келмоқда: Саудия Арабистонининг илтимосларига рози бўлиб, АҚШ ҳарбийларига ҳусийлар назоратидаги нишонларга зарба беришни буюриш керакми?
Бундай қарор эса ҳусийларни қўллаб-қувватлайдиган Эронга қарши урушда яна бир фронт очиб юбориши мумкин эди. Трамп эса ўзи бошлаб, бутун дунё иқтисодиётига зарба бериб келаётган урушни ярим йилдан ортиқ вақтдан бери якунлай олмаяпти.
Трамп Саудия Арабистонининг ҳусийларга қарши курашда ёрдам сўраб қилган мурожаатлари юзасидан бир неча ҳафта давомида иккиланиб келган.
17-сентабр, пайшанба куни вазият янада кескинлашди. АҚШ маъмурияти расмийларининг нашрга айтишича, Саудия Арабистони валиаҳд шаҳзодаси Муҳаммад бин Салмон президентга қўнғироқ қилган. Қиролликнинг де-факто раҳбари ва Эрон урушида АҚШнинг асосий иттифоқчиси бўлган шаҳзода жадал илгарилаётган ҳусийлар ҳужумини секинлаштиришга ёрдам бериш учун Трампдан яна бир бор аралашишни сўраган.
Трамп бундан бир кун олдин маслаҳатчилари билан учрашиб, уларга зарбалар бериш тарафдори эмаслигини айтган эди. Аммо валиаҳд шаҳзода билан суҳбатдан сўнг у фикрини ўзгартириб, Пентагонга ҳаво зарбаларига тайёргарлик кўришни буюрди.
Бироқ якшанба куни тушга келиб, президент яна фикридан қайтганга ўхшади, деб ёзади Тимес. Нашр билан гаплашган Оқ уй расмийларига кўра, АҚШ ҳусийларга ҳаво зарбалари бермайди. Ҳеч бўлмаганда ҳозирча. Расмийлар ҳарбий режаларни муҳокама қилиш ваколатига эга бўлмагани учун исмларини ошкор қилмаслик шарти билан гапирган.
Оқ уй матбуот хизмати эса Трампнинг қарор қабул қилиш жараёнига расман изоҳ беришдан бош тортди. Маъмуриятнинг юқори мартабали расмийларидан бири фақат шундай деди: «АҚШнинг Саудия Арабистони билан мудофаа келишуви бор ва биз доим иттифоқчиларимизни ҳимоя қиламиз».
Маъмуриятдаги яна бир юқори лавозимли манбага кўра, президентнинг яқин атрофидагиларнинг аксарияти Саудиянинг ҳусийларга қарши урушига қўшилишга шубҳа билан қараган ёки бунга очиқ қарши чиққан. Бунинг асосий сабаби АҚШ ҳарбийлари Эрон билан урушда аллақачон дуч келаётган босим эди.