Трамп Россия сори юз бурди – ҳафта дайжести
Ҳафта давомида АҚШ президенти Трамп Россия фойдасига бир нечта қарорлар қабул қилди, Украинани разведка маълумотлари ва армия учун тезкор интернетдан маҳрум қилди. Яман президентига суиқасд бўлди, унинг саройига ракета учиришди. Путин навбатдаги марта Украинага таҳдид қилди. Қуйида ҳафтанинг баъзи муҳим воқеаларини ёдга оламиз.
Трамп Россия томон юзланди – ҳафта дайжести
АҚШ президенти Доналд Трамп Украинадаги уруш масаласида энди бутунлай Россия тарафини олди. Киев Россия нефт заводларига зарба бермаслик ҳақидаги талабни рад этгач, у Киевга тўлиқ қарши чиқди. У ҳафта давомида бир неча бор «Украина янги лидер танлаши кераклиги, Зеленский билан келишиб бўлмаслигини» такрорлади. Кейин интервю бериб, «Зеленский АҚШ бирга ишлашни хоҳлайдиган одам эмас», деди. Путин билан телефонда гаплашиб, АҚШ Россиядан «солярка» сотиб олиши бўйича келишувга эришди, Москвага нисбатан бу борадаги санксияларни олиб ташлади.
Украина армияси фойдаланаётган Старлинк терминаллари тезлиги пасайтириб қўйилди, натижада украинлар фронтда жиддий муаммога дуч келди. Бу чеклов ортида Трамп билан яна яқинлашиб олган Илон Маск тургани айтилди, бироқ миллиардер ҳарбий терминаллар тезлигини Пентагон назорат қилишини билдирди. Кейинроқ журналистлар бу борадаги буйруқ Оқ уйдан келганини аниқлади.
Америка Украинага Россия зарбалари ҳақида разведка маълумотлари беришни тўхтатди. Шу сабаб русларнинг одатдагидан кўпроқ зарбалари нишонга етиб борди. Америкадан кейин ғарблик бошқа иттифоқчилар ҳам разведка маълумотлари беришни тўхтатган кўринади, фақат Канада ўз маълумотларини улашгани аниқ. АҚШ урушга алоқадор бошқа масалаларда ҳам Киевга разведка маълумотлари беришни тўхтатган.
Ҳужжат Конгресдан эсон-омон ўтганди, аммо Трамп ундаги чекловларни юмшатгани маълум бўлди. Масалан, Россия нефтини сотиб олганларга 100 фоиз, Россия товарларининг ўзига 500 фоиз бож қўйилмайдиган бўлди.
Трамп бир пайтлар айнан Зеленский билан мулоқотдан кейин бошланган импичмент можаросини унутгани йўқ. Мана, энди Украинага қарши хоҳлаган ишини қилмоқда. Россия фойдасига янги-янги қарорлар чиқса ҳам, ажабланманг.
Россия президенти Путин илк бор Украинанинг ВБ омборлари ва Яндех дата-марказларига берилган зарбаларга муносабат билдирди. «Душманнинг ҳам ВБ, ҳам Озон платформаларига нисбатан ҳаракатларига дуч келдик. Дарвоқе, улар доим шундай қадамларни ташлайдиларки, очиғини айтганда, биз буларни олдиндан кўра билишимиз керак эди. Аммо бу даражагача боришмайди деб ўйлагандик», деди Путин.
Россия президенти «Украина бошлаганидан кейин руслар ҳам жавоб бериб Украинадаги шундай нишонларни урганини» айтди. Россия аслида Украинадаги дата-марказларга аввалроқ зарба берганди, ўзи бу давлатда рус ракетаси етиб бормаган қанақадир обьект қолмади ҳисоб. Лекин Украинанинг ВБ ва Яндех'га зарбалари катта шов-шувга сабаб бўлди. Шунчалик каттаки, Россия президенти «Энди ўзингиздан кўринг, биз янаям кучли зарба берамиз», деб чиқяпти. Ваҳоланки, руслар учун Украина дата-марказларини нишонга олиш янгилик ҳам, муаммо ҳам эмас.