Трамп маъмурияти 200 минг бошпана сўраган хорижликнинг визаларини бекор қилмоқчи

Доналд Трамп маъмурияти 24-август куни АҚШдан бошпана сўраган хорижликларнинг визаларини бекор қилиш ниятида эканлигини маълум қилди. Бу ҳукуматнинг иммиграцияни чеклашга қаратилган навбатдаги ҳаракати бўлди.

АҚШ Давлат департаменти вакили Ички хавфсизлик вазирлиги билан ҳамкорликда иш олиб борилаётганини таъкидлади. Уларнинг мақсади АҚШга қисқа муддатли ташриф буюрувчи сифатида келган, аммо кейинчалик доимий яшаш учун бошпана сўраган хорижликларнинг визаларини бекор қилишдир.

Давлат департаменти баёнотида қанча виза бекор қилиниши аниқ кўрсатилмаган. Бироқ, Ассосиатед Пресс агентлигининг хабар беришича, 200 мингтагача хорижликнинг бизнес ва туризм визалари бекор қилиниши мумкин. Агар бу амалга ошса, бу АҚШ тарихидаги энг йирик оммавий виза бекор қилиниши бўлади. Агентлик бу маълумотни Давлат департаменти ҳужжатлари ва икки нафар америкалик мулозимга таяниб тарқатди.

Хабарда айтилишича, Давлат департаменти 2016-йилдан 2026-йилгача берилган Б1 ва Б2 визаларини бекор қилади. Бу визалар бизнес ва туризм мақсадида берилган бўлиб, уларнинг эгалари бошпана сўраган ёки ҳозирда сўрамоқда.

Визаларнинг бекор қилиниши уларнинг дарҳол мамлакатдан чиқариб юборилишини англатмайди. Бошпана сўровлари кўрилаётган шахсларнинг мақоми қайта таснифланади. Лекин улар бизнес ёки туризм ташрифчиси мақомини йўқотади.

Давлат котиби ўринбосари Кристофер Ландау Х тармоғида баёнот бериб, Америка иммиграция тизими узоқ вақтдан бери асоссиз бошпана сўровлари билан тўлиб кетганини айтди. Давлат департаменти август ойи бошида ҳам маълумот бериб, Трамп маъмурияти даврида хорижликларнинг 175 мингдан ортиқ визаси бекор қилинганини билдирган эди.

Трамп иммиграцияни чеклаш бўйича қатъий сиёсат олиб бормоқда. Бунга визалар ва грин карталарни бекор қилиш ҳамда мамлакатдан мажбурий чиқариб юбориш киради. У бу чоралар мамлакат ички хавфсизлигини яхшилашга қаратилганини айтмоқда.

Ҳуқуқ ҳимоячилари эса бу чораларни танқид қилмоқда. Уларнинг таъкидлашича, чекловлар сўз эркинлиги ва тегишли ҳуқуқларни бузмоқда. Шунингдек, хавфсиз бўлмаган муҳит яратилмоқда. Айниқса, бу ирқий камситишдан хавотирда бўлган миллий озчиликлар учун қийинчилик туғдирмоқда.

Трамп 2024-йилги сайлов кампаниясида ноқонуний иммиграцияни тўхтатишни ваъда қилган эди. Лекин унинг маъмурияти қонуний иммиграцияни ҳам амалда қийинлаштирди. Масалан, айрим ищи визалари учун янги ва қиммат тўловлар жорий этилди. Ҳукуматнинг бу қарорлари судларда эътирозларга учрамоқда. Аввалроқ АҚШ федерал суди Ўзбекистон ва яна 74 та давлат фуқароларига иммиграцион виза беришни тўхтатиш ҳақидаги қарорни бекор қилгани ҳақида хабар берилганди.