Трамп Эронга қарши кенг кўламли иқтисодий уруш эълон қилди
АҚШ президенти Доналд Трамп Эронга қарши мисли кўрилмаган кўламдаги иқтисодий босим кампанияси бошланганини маълум қилди. У Теҳронни қўллаб-қувватлайдиган ёки Эрон билан савдо ва бошқа бизнес алоқаларини давом эттирадиган ҳар қандай давлатни «улкан» санксиялар билан огоҳлантирди.
**Трамп Эронга қарши мисли кўрилмаган иқтисодий уруш эълон қилди**
АҚШ президенти Доналд Трамп 20-август, пайшанба куни Эрон Ислом Республикасига қарши кенг кўламли иқтисодий операция бошланганини маълум қилди. Бу ҳақда у ўзининг Трутҳ Сосиал ижтимоий тармоғидаги саҳифасида ёзди.
Трампнинг таъкидлашича, бу "бирор давлатга қарши қачондир амалга оширилган энг вайронкор иқтисодий операция" бўлиб, "мисли кўрилмаган кўламдаги иқтисодий уруш ва изоляция"ни англатади.
АҚШ раҳбари, шунингдек, Эронни қўллаб-қувватлайдиган ёки у билан иқтисодий ҳамкорликни давом эттирадиган давлатларга нисбатан қатъий чоралар кўрилишини билдирди. Унинг сўзларига кўра, бундай мамлакатлар "улкан" санксияларга дуч келиши мумкин.
Трамп Вашингтоннинг иттифоқчиларини ҳам Теҳронга қарши иқтисодий босим кампаниясига қўшилишга чақирди. "Эрон таҳдидини яккалаш ва уни енгиш учун барча иттифоқчиларимизнинг қўллаб-қувватлаши керак", - деди АҚШ президенти.
АҚШ аввалроқ ҳам Эрон иқтисодиётининг муҳим тармоқларига, хусусан, нефт саноати, денгиз орқали юк ташиш ва молия секторларига қарши кенг қамровли санксиялар жорий этган эди. Вашингтоннинг асосий мақсадларидан бири Теҳроннинг энергия ресурслари экспортидан оладиган даромадларини кескин қисқартириш ҳисобланади.
Трамп эълон қилган янги чоралар АҚШ апрел ойи бошида маълум қилган "Иқтисодий ғазаб" операцияси доирасидаги босим кампаниясининг давоми бўлиши мумкин.
Айни пайтда Эрон билан иқтисодий алоқаларни чеклаш бўйича айрим давлатлар ҳам чора кўра бошлаган. Хусусан, Бирлашган Араб Амирликлари 18-август куни Эрон билан барча савдо-сотиқ, тижорий алмашинувлар ва молиявий операцияларни кейинги хабарга қадар тўхтатишини эълон қилди. БАА расмийлари бу қарорни Теҳрон томонидан мамлакат йўналишида иккита ракета учирилгани ҳақидаги даъволар билан изоҳлади. Амирликлар томонига кўра, ҳужумдан кўзланган мақсад денгиз қатновига таҳдид солиш бўлган. Эрон эса БАА томонидан билдирилган ушбу айбловларни рад этди.