Трамп БМТ минбарида нутқ сўзлади: Эрон, Куба, Гренландия ва «Супер-интеллект»
АҚШ президенти қарийб бир соатлик нутқида Эронни кескин огоҳлантирди, Россия–Украина урушини тезда тугатишга ваъда берди ва сунъий интеллектни «супер-интеллект» деб аташни таклиф қилди.
Трамп БМТ минбарида нутқ сўзлади: Эрон, Куба, Гренландия ва «Супер-интеллект»
АҚШ президенти Доналд Трамп 22-сентабр куни Ню-Ёркда БМТ Бош Ассамблеясининг 81-сессиясида нутқ билан чиқди.
Бу чиқиш жорий йилги «Ишончни тиклаш, ўзгаришларни бошқариш» мавзусидаги юқори даражадаги ҳафталикнинг асосий воқеаларидан бирига айланди. Нутқдан кейин Трамп жаҳон етакчилари билан бир қатор икки томонлама учрашувлар ҳам ўтказди.
Нутқнинг марказий мавзуси Эрон бўлди. Трамп ўзини оғир танлов қаршисида турганини айтди:
«Мен муҳим қарор қабул қилишим керак. Эрон билан келишувга эришиб, уларга тикланиш ва аввалгига қараганда анча буюкроқ мамлакатни, эҳтимол, Яқин Шарқдаги ёки ҳатто дунёдаги энг буюк давлатлардан бирини барпо этиш имконини бераманми? Ёки мен Эронни йўқ қиламанми ва буни тезда, уларга яна одамларни ўлдириш ва мамлакатларни вайрон қилиш имкониятини бермасдан қиламанми? Ёки мен уларни тирик қолиш имкониятисиз ва келажак авлодлар учун буюклик умидисиз дўзахга маҳкум этаманми?».
Унинг айтишича, Эрон билан келишув «сайловдан сўнг дарҳол» — яъни АҚШ оралиқ сайловларидан кейин тузилиши мумкин.
Куба масаласига тўхталар экан, Трамп шундай деди: «Менинг маъмуриятим, шунингдек, коммунистик режим ўз тарихидаги энг кучли босим остида бўлган Кубадаги вазиятни тубдан ўзгартиришга интилмоқда. Бу мутлақо барбод бўлган давлат... У ҳар қачонгидан ҳам кўпроқ муваффақияцизликка учрамоқда ва у қулайди». Шу гаплардан сўнг Куба делегацияси мажлислар залини намойишкорона тарк этди. Трампнинг таъкидлашича, ҳозир Ҳавана билан музокараларни давлат котиби Марко Рубио олиб бормоқда: «У Куба билан музокараларга жиддий киришган».
Трамп Россия ва Украина раҳбарлари билан яқин ҳамкорлик қилаётганини ва можарони якунлашга эришиш ниятида эканини айтди — унинг сўзларига кўра, «бу албатта ва тезда содир бўлади».
Президент АҚШ оролда иккита йирик ҳарбий база қуришини ва Дания билан келишув шу куниёқ имзоланишини тасдиқлади. У, шунингдек, Гренландия бўйича келишувни НАТО мавқеини мустаҳкамлаш билан боғлади: «Американинг Арктика ва Шимолий Атлантикадаги иштирокини кенгайтириш орқали бу келишув нафақат АҚШ, балки Европани ҳам ҳимоя қилади ва кўп жиҳатдан НАТО мавқеини мустаҳкамлайди».