Трамп: АҚШ Ҳўрмуз бўғозини тўлиқ назорат қилмоқда
Эрон эса бунга қарши ҳеч нарса қила олмайди, деди Оқ уй раҳбари.
Трампнинг сўзларига кўра, АҚШ Ҳўрмуз бўғозини тўлиқ назорат қилмоқда.
Америка Қўшма Штатлари президенти Доналд Трамп ўзининг Трутҳ Сосиал саҳифасида АҚШ Қуролли кучлари Ҳўрмуз бўғози устидан назоратни сақлаб қолишини маълум қилди.
Сиёсатчи шундай деди: "АҚШ Ҳўрмуз бўғозини тўлиқ назорат қилади. Ўйлайманки, биз бу назоратни сақлаб қоламиз. Бизнинг денгиз блокадамизни ҳамма "пўлат девор" деб атайди, Эрон эса бунга қарши ҳеч нарса қила олмайди".
Шу билан бирга, 11-август куни Эрон Миллий хавфсизлик олий кенгаши котиби Муҳсин Ризоийнинг таъкидлашича, Қўшма Штатлар ўз хатти-ҳаракатларини ўзгартириши ва Эрон шартларини қабул қилиши керак, акс ҳолда Ҳўрмуз ёпиқлигича қолади. Унинг сўзларига кўра, АҚШ бутун минтақани хавф остига қўйган ноқонуний урушни бошлаган.
АҚШ июл ойида Эрон портлари блокадасини қайта тиклади. 8-август куни вице-президент Жей Ди Венс Теҳрон билан зиддиятни бартараф этиш бўйича музокараларда муайян ютуқларга эришилганини маълум қилди. Реутерс агентлигининг хабар беришича, Эрон йўлакдан ўтиш учун ҳақ талаб қилмасликка рози бўлган, бироқ афтидан, унга кираётган кемаларни назорат қилиш ҳуқуқини олган.