“Тоттенҳем” “Манчестер Сити”нинг яна бир футболчисини ўз сафига қўшиб олди — ОАВ

“Тоттенҳем” “Манчестер Сити”дан яна бир футболчини ижарага олди — ОАВ хабари

“Тоттенҳем” “Манчестер Сити” ҳужумчиси Омар Мармушни бир мавсумга ижарага олиш бўйича келишувга эришди. Келишувга кўра, Лондон клуби келаси йили футболчини 60 миллион фунт эвазига мажбурий равишда сотиб олади.

Миср терма жамоаси аъзоси “Тоттенҳем”да тиббий кўрикдан ўтиши билан трансфер расмийлаштирилади.

Бу “шпорлар”нинг бир неча кун ичида “Манчестер Сити”дан амалга оширган иккинчи трансфери бўлади. Аввалроқ жамоа бразилиялик вингер Савинёни дастлабки 75 миллион фунт эвазига ўз сафига қўшиб олган эди.

Шунингдек, бу Лондон клубининг ёзги трансферлар ойнасидаги фаол сиёсатининг давоми ҳисобланади. “Тоттенҳем” аввалроқ Сандро Тонали, Матеуш Фернандеш, Ян Пол ван Ҳекке, Эндрю Роберцон ва Маркос Сенесини ҳам таркибига қўшиб олган.

Мармуш учун 60 миллион фунт тўланиши “Манчестер Сити”га футболчи учун 2025-йилнинг январида Франкфуртнинг “Айнтрахт” клубига тўлаган 59 миллион фунтни қайтариш имконини беради.

27 ёшли Мармуш “Манчестер Сити” сафида 62 та учрашувда 16 та гол урган. Бироқ у асосан Эрлинг Ҳоланднинг ўрнини босувчи футболчи сифатида майдонга тушган.

У якшанба куни АПЛнинг “Борнмут”га қарши илк тур учрашувида фойдаланилмаган захира футболчиси бўлиб қолди. Мармушнинг клуб сафидаги сўнгги ўйини эса бир ҳафта аввал бўлиб ўтган Англия Суперкубоги баҳсига тўғри келади.

“Манчестер Сити” учун ҳам ёзги трансферлар ойнаси катта ўзгаришлар билан кечмоқда. Мармушнинг кетиши арафасида Родри, Бернардо Силва, Жон Стоунз, Тижжани Рейндерс, Натан Аке ва Жеймс Траффорд жамоани тарк этди. Нико Гонсалес ҳам трансфер ойнаси ёпилишидан олдин клубни тарк этиши мумкин.