Тошкентнинг транспорт мастер-режаси тайёрланади. Танловда СТЕП Ситй ғолиб чиқди

Тошкент шаҳрининг транспорт мастер-режаси ва макромоделини ишлаб чиқиш бўйича танловда СТЕП Ситй компанияси ғолиб бўлди. Бу ишлар 2026-йил сентабр ойи охиригача якунланиши режалаштирилган. Бу ҳақда Халқ депутатлари Тошкент шаҳар кенгашининг 22-июлдаги қарорида шаҳар ҳокимининг транспорт ва йўл инфратузилмаси бўйича ўринбосари Абдураҳмон Бахтиевнинг ҳисоботига таяниб маълум қилинди.

Мастер-режа ва макромоделни ишлаб чиқувчини танлаш учун АҚШ, Буюк Британия, Германия, Италия, Канада, Россия, Швеция ва Франсиядан 90 дан ортиқ компания иштирокида танлов ўтказилган. Ғолиб бўлган СТЕП Ситй компаниясига пойтахт мастер-режаси ва макромоделини сентабр ойи охиригача якунлаш вазифаси юклатилди.

Аввалроқ, феврал ойида Тошкент шаҳар ҳокимлиги 2045-йилгача бўлган даврни қамраб олувчи транспорт мастер-режасини ишлаб чиқиш бўйича таклифлар йиғишини эълон қилган эди. Таклифлар сўрови тартибини Йўл ҳаракатини ташкил этиш маркази ўтказган, манфаатдор компанияларнинг аризалари 9-мартгача қабул қилинган.

Феврал ойи охирида Президент администрацияси раҳбари Саида Мирзиёева Тошкент транспорт тизимини амалий модернизация қилиш бошланганини маълум қилганди. Кўзда тутилган чора-тадбирлар қаторида "ақлли" светофорлар ўрнатиш, йўл чизиқларини яхшилаш, автотураргоҳларни тартибга солиш ва жамоат транспорти иши устидан назоратни кучайтириш қайд этилган эди.

СТЕП Ситй – транспортни режалаштириш, шаҳар мобиллиги ва ҳаракатни рақамли бошқариш соҳасидаги халқаро компания бўлиб, 2017-йилда Москвада ташкил этилган. Компания маълумотларига кўра, унинг портфелида Россия, Қозоғистон, Ўзбекистон, Озарбайжон ва Қирғизистоннинг 30 та шаҳрида 500 дан ортиқ лойиҳа мавжуд. Компания транспорт мастер-режалари ва моделлари, ҳаракатни ташкил этиш, жамоат транспорти, тўхташ жойлари ҳамда интеллектуал транспорт тизимлари лойиҳаларини ишлаб чиқади.

Ўзбекистонда СТЕП Ситй илгари Тошкент шаҳрининг шаҳар мобиллиги стратегиясини ишлаб чиққан эди. Бу лойиҳа транспорт тизими диагностикаси, инфратузилма ва ҳаракат хавфсизлигини ривожлантириш бўйича таклифлар, интеллектуал транспорт тизими архитектураси, МааС иловаси прототипи ва Вазиятлар маркази учун рақамли платформани ўз ичига олган.

Шу билан бирга, германиялик мутахассислар иштирокида Тошкент шаҳрининг интеллектуал транспорт тизимини жорий этиш бўйича техник топшириқ ишлаб чиқилди. Ҳокимият светофорларни адаптив бошқариш ва сунъий интеллект қўллаган ҳолда транспорт оқимларини таҳлил қилиш соҳасида тажрибага эга 12 та компания билан музокаралар ўтказди. Улар орасида Австриянинг СВАРСО, Германиянинг Сиеменс Мобилитй, АҚШнинг Субис Транспортатион Сйстемс ва Хитойнинг Ҳуавеи компаниялари бор.

"Тезкор яхшилаш" лойиҳалари доирасида умумий узунлиги 260 км бўлган кўчалар таҳлил қилинди. Ечимларни тайёрлашда топографик хариталар, дронлардан олинган тасвирлар ва 271 та чорраҳадаги ҳаракат жадаллигига оид маълумотлардан фойдаланилди. Ушбу чорраҳаларда 3946 та светофор ўрнатилди. Қарорда таъкидланишича, улар энг тирбанд йўналишларда яшил чироқ вақтини автоматик равишда узайтириш ва узлуксиз "яшил коридорлар" яратиш имконини беради.

Бундан ташқари, пойтахтда 1349 та янги йўл белгиси ўрнатилди, мавжуд 2909 таси алмаштирилди, 176 км йўл чизиқлари чизилди ҳамда қарийб 720 минг кв метр асфалт қопламаси жорий таъмирланди. Транспорт тирбандлигини камайтириш мақсадида 61 та чорраҳада қурилиш ишлари олиб борилди. Автомобил йўлларида ташқи ёритишнинг 2889 та таянчи таъмирланди, шунингдек, ҳайдовчилар эътиборини чалғитаётган 902 та реклама конструксияси демонтаж қилинди.

Кенгаш қарорида, шунингдек, Тошкент атрофида қиймати 1 млрд долларлик 100 километрлик икки қаватли пулли айланма йўл қуриш таклиф этилаётгани айтилади. Лойиҳа Чина Раилвай Сонструстион билан ҳамкорликда амалга оширилиши мумкин. Ҳокимият, шунингдек, Хитой компаниялари билан туннеллар, йўлўтказгичлар ва ўнлаб километрлик БРТ тармоқларини қуришни муҳокама қилмоқда.