Тошкентнинг барча туманларида йирик кутубхоналар қурилади - ҳоким
Шавкат Умрзоқовга кўра, пойтахтнинг 12 та туманида қуриладиган йирик ва замонавий кутубхоналар учун аллақачон жойлар белгилаб олинган. “Энг илғор мамлакатларда кутубхоналар – шаҳарнинг энг севимли масканларидан бири бўлади. Ривожланишда янги босқичга чиқмоқчи эканмиз, пойтахтимизда ҳам кутубхоналар энг кўримли ва шинам масканларга айланиши шарт”, деди Тошкент ҳокими.
Тошкент шаҳар ҳокими Шавкат Умрзоқовнинг маълум қилишича, пойтахтнинг барча 12 та туманида йирик ва замонавий кутубхоналар барпо этилади, уларнинг жойлашув нуқталари аллақачон аниқланган.
Ҳоким ЎзАга берган интервюсида шундай деди: “12 та туманнинг ҳар бирида йирик, интерактив ва замонавий кутубхона қуриш режалаштирилган, жойлари аллақачон белгиланган. Биласизми, мақсадимиз – шунчаки китоб сақланадиган бино қуриш эмас, балки йилига миллионлаб одам ташриф буюрадиган ва ўзининг илмий-маънавий эҳтиёжларини қондира оладиган жамоат маконини яратишдир”.
Умрзоқовнинг сўзларига кўра, пойтахтдаги барча 585 та маҳаллада босқичма-босқич китоб бурчаклари ҳам ташкил этилади.
27-июл куни имзоланган президент қарорига мувофиқ, Тошкент шаҳрида майдони 5 минг квадрат метрдан ортиқ бўлган савдо марказларида китоб дўконларини ташкил этиш мажбурий этиб белгиланди.
“Энг илғор мамлакатларда кутубхоналар – шаҳарнинг энг севимли масканларидан бири бўлади. Ривожланишда янги босқичга чиқмоқчи эканмиз, пойтахтимизда ҳам кутубхоналар энг кўримли ва шинам масканларга айланиши шарт. Ҳаттоки гавжум ва туристик кўчаларимизда ҳам имтиёзли шартларда китоб дўконлари ва китоб кафелари очилади”, – дея таъкидлади ҳоким.
Шунингдек, у тарихан китоб савдосининг маркази бўлган жойни мутолаа маданиятига ихтисослашган жамоат маконига айлантириш режалаштирилганини айтди. Жорий йил июлида мажмуанинг тарихий қиёфасини тўлиқ тиклаш эълон қилинган бўлиб, лойиҳа китобхонлар ва жамоатчилик муҳокамаси билан амалга оширилади.
Ҳокимнинг фикрича, инфратузилманинг ўзи етарли эмас, рағбат ҳам керак.
Юқоридаги қарорда, шунингдек, китоблар савдосини ташкил этиш учун тақдим этиладиган муниципал мулклар (бино ва иншоотлар) Тошкент шаҳар ҳокими қарори билан китоб савдогарларига 5 йил муддатга текин фойдаланиш ҳуқуқи асосида тўғридан-тўғри берилиши ҳам кўзда тутилган.
Маълумот учун, Фарғонада кутубхоналар сони кескин камайган.