Тошкентдан Фарғона водийси йўналишида ҳаракат икки кунга ёпилади
Тошкентдан Фарғона водийси йўналишида ҳаракатланиш икки кунга чекланади
Пойтахтнинг Бектемир туманидаги А373 «Тошкент — Ўш» трассасининг биринчи километрида жойлашган Чирчиқ дарёси устидаги кўприкда Фарғона водийси томонга ўтиш вақтинча ёпилади.
Автомобиль йўллари қўмитаси маълум қилишича, таъмирлаш ишлари муносабати билан чекловлар 28 октябрь соат 08:00 дан 30 октябрь соат 08:00 гача амал қилади.
Автомобилчиларга қулайлик яратиш мақсадида айланма йўналишлар кўзда тутилган. Тошкентдан Оҳангарон шоссесига чиқишда транспорт воситалари Тошкент ҳалқа автомобиль йўлининг 47-километри — «Роҳат» йўл ўтказгичи орқали Қўйлиқ томонга йўналтирилади.
Пойтахтга кириш D012 «Бектемир — Чирчиқ — Ғазалкент — Чорвоқ» йўлининг 6-километри орқали Ик-ота ва Фарғона шоссеси йўналишида ташкил этилади.
Ҳайдовчиларга чекловларни олдиндан ҳисобга олиш ва ўзгаришларни эътиборга олган ҳолда йўналишни танлаш тавсия этилади.