Тошкентдаги Фитрат ва Ҳайдар Алиев кўчалари чорраҳасида светофор қайта созланди

Тошкент шаҳридаги Фитрат ва Ҳайдар Алиев кўчалари чорраҳасида светофорнинг ишлаш тартиби қайта кўриб чиқилди ва созланди. Бу ўзгаришдан мақсад транспорт оқимини яхшилаш бўлиб, натижада кундузги вақтда автомобиллар навбати қисқарди ва чорраҳадан ўтиш вақти 2 дақиқагача камайди.

Йўл ҳаракатини ташкил этиш маркази (ЙҲТЕМ) мутахассислари чорраҳадаги транспорт оқимини чуқур ўрганиб чиқдилар. Улар автомобиллар қайси йўналишларда кўпроқ тўпланишини аниқлаганларидан сўнг, светофорнинг сиклини мавжуд транспорт юкламасига мослаштирдилар.

Аввалги тартибга кўра, светофорнинг биринчи фазаси 35 сония, иккинчи фазаси эса 28 сония давом этган. Янги созлашлар натижасида, энг кўп транспорт тўпланадиган йўналиш учун яшил чироқ вақти 35 сониядан 60 сониягача узайтирилди.

Бундан ташқари, қарама-қарши йўналишдаги автомобиллар энди бироз олдинроқ тўхтайди. Бу чорраҳада бурилаётган транспорт воситаларига маневрни хавфсиз якунлаш ва чорраҳани тезроқ бўшатиш имконини беради. Ушбу ўзгариш бир сикл давомида чорраҳадан кўпроқ автомобил ўтказишга ёрдам беради.

ЙҲТЕМ маълумотларига кўра, ушбу ўзгаришлардан сўнг кундузги вақтда автомобиллар навбати сезиларли даражада қисқарган, ҳаракат бир маромга тушган ва чорраҳадан ўтиш вақти 2 дақиқагача камайган.

Шу билан бирга, чорраҳа яқинида темирйўл кесишмаси мавжудлиги сабабли, поезд ўтиши вақтида автомобиллар ҳаракати вақтинча тўхтатилади. Бу пайтда чорраҳада қисқа муддатга транспорт воситалари тўпланиши мумкин.

Марказ вазиятни кузатишда давом этмоқда. Мутахассислар эрталабки ва кечки тиғиз вақтлар учун светофорнинг алоҳида иш режимларини ишлаб чиқиш устида ишламоқда.

Кейинги босқичда қўшни чорраҳалардаги светофорларни ҳам янгилаш ва уларни ягона “Яшил тўлқин” тизимига улаш режалаштирилган. Бу тизим рухсат этилган тезликда ҳаракатланаётган автомобилларга чорраҳалардан кетма-кет яшил чироқда ўтиш ва камроқ тўхташ имконини беради.

Жорий йилнинг июл ойи охирида Тошкент шаҳрида светофорлар ўзаро синхрон ишлашига асосланган “Яшил тўлқин” тизимининг илк йўналиши ишга туширилган эди. Бу тизим Буюк ипак йўли кўчасининг “Тўра Бува” масжидидан Салом кўчасигача бўлган қисмидаги 13 та чорраҳада жорий этилган.