Тошкентда ёмғирдан олдин қисқа муддатли чанг-тўзонлар кузатилиши мумкин
Якшанба куни Тошкентда ёмғир ёғиши олдидан қисқа муддатли чанг-тўзон кўтарилиши мумкин. Махсус комиссия шамол 14 м/с гача кучайиб, ҳавода ПМ10 чанг заррачалари ортишидан огоҳлантирди.
Тошкентда ёмғирдан аввал қисқа муддатли чанг-тўзонлар кузатилиши мумкин
4 октбяр куни Тошкент шаҳрида ёмғир бошланишидан олдин қисқа муддатли чанг-тўзон ҳодисалари юзага келиши эҳтимоли бор, дея шаҳарда экологик вазиятни яхшилаш бўйича тузилган махсус комиссия огоҳлантирмоқда.
Глобал об-ҳаво моделлари ҳамда Ўзгидромет прогнозларига кўра, пойтахт ҳудудига нам ҳаво массалари кириб келиши кутилмоқда. Шу сабаб шамол тезлиги 3−8 м/с гача, айрим ҳудудларда эса 10−14 м/с гача кучайиши мумкин.
Шамолнинг кучайиши натижасида айрим жойларда чанг-тўзонлар кўтарилиб, атмосфера ҳавосидаги чанг заррачалари, хусусан, ПМ10 консентрацияси қисқа муддатга ошиши эҳтимоли мавжуд.
“Ҳозирда атмосфера ҳавоси сифати махсус комиссия томонидан доимий мониторинг қилинмоқда”, — дейилади хабарда.
Аввалроқ Ўзгидромет ҳам 3−5-октабр кунлари Ўзбекистонга совуқ ва нам ҳаво кириб келиши, ёмғир ёғиб, тоғларда қорга айланиши, шамол эса 22 м/с гача кучайиши ҳақида хабар берганди.
Айрим жойларда туман тушиши кутилмоқда.