Тошкентда яширин пиво цехи фаолиятига чек қўйилди
Тошкентда яширин пиво цехи фаолиятига чек қўйилди
Тошкентнинг Мирзо Улуғбек туманидаги хонадонлардан бирида ноқонуний пиво ишлаб чиқариш аниқланди. Хавфсизлик талабларига жавоб бермайдиган ва истеъмол учун хавфли бўлган 22 турдаги ичимлик мусодара қилинди.
Ноқонуний фаолият Бош прокуратура ҳузуридаги Департаментнинг Тошкент шаҳар бошқармаси ходимлари томонидан бошқа ҳуқуқни муҳофаза қилувчи органлар билан ҳамкорликда ўтказилган тезкор тадбир давомида аниқланди.
Пиво маҳсулотларини қўлбола усулда чиқаришни пойтахтда яшовчи фуқаро шериклари билан биргаликда "Солар бўйи" кўчасидаги хонадонлардан бирида ташкил этган. Бинодан 22 турдаги пиво, шунингдек, тайёрлаш жараёнида фойдаланилган хомашё ва бошқа материаллар топилди. Идора маълумотларига кўра, маҳсулотлар истеъмол учун яроқсиз бўлган.
Мазкур ҳолат юзасидан хавфсизлик талабларига жавоб бермайдиган товарларни ишлаб чиқариш ёки ўтказиш учун жавобгарликни назарда тутувчи модда бўйича жиноят иши қўзғатилди.
Ҳозирда тергов ҳаракатлари олиб борилмоқда. Ҳуқуқни муҳофаза қилувчи органлар ноқонуний ишлаб чиқаришнинг барча тафсилотларини ва маҳсулотларни тарқатишнинг эҳтимолий каналларини аниқлашлари керак.
Аввалроқ Фарғона вилоятида қалбаки акциз маркали алкоголь маҳсулотлари ишлаб чиқарувчи яширин цех аниқланган эди.