Тошкентда янги турдаги мактаб ва болалар боғчалари қурилиши бошланди (+фото)
Тошкентда 12 та замонавий мактаб қурилиши бошланди. Лойиҳа NRG-BI компанияси билан ҳамкорликда амалга оширилмоқда. Кейинги ўқув йили бошигача 18 мингта янги ўқувчи ўрни яратилиши керак. Қўшимча равишда 16 та замонавий боғча қуриш лойиҳаси ишлаб чиқилди. Фото.
Тошкентда янги типдаги мактаб ва боғчалар қурилиши бошланди (+фото)
Шу ҳафта Тошкентда бир вақтнинг ўзида 12 та замонавий мактаб қурилиши бошланди. Лойиҳа NRG-BI қурилиш компанияси билан ҳамкорликда амалга оширилмоқда.
Янги мактаблар Бектемир туманидан ташқари, 12 та тумандан 11 тасида барпо этилади. Янгиҳаёт туманида иккита мактаб қурилади.
Қурилиш ишлари саккиз ойга мўлжалланган. Кейинги ўқув йили бошигача жами 18 мингта янги ўқувчи ўрни яратиш режалаштирилган.
«Бу янги форматдаги — технологик, эргономик, қулай ва инклюзив мактаблар бўлади. Лойиҳалар замонавий меъморий ечимлар ва зарур инфратузилмани ҳисобга олган ҳолда уч хил типда ишлаб чиқилган», — деб хабар берди пойтахт ҳокимлиги матбуот хизмати.
Шаҳар ҳокими ўринбосари Дурдона Раҳимованинг маълум қилишича, мактабларнинг сиғими 1500 дан 2000 ўрингача бўлади.
NRG-BI бошқарувчи директори Нурбол Шалкеновнинг сўзларига кўра, мактаблар халқаро стандартлар ва замонавий таълим амалиётларини қўллаган ҳолда лойиҳалаштирилган. Улар беш қаватли бўлиб, мавжуд мактабларга қўшимча равишда қурилиши мумкин бўлган еттита ўқув блокидан иборат бўлади.
Бундан ташқари, 16 та замонавий болалар боғчаси қурилиши лойиҳаси ҳам ишлаб чиқилган. Улар беш хил типда бўлади, деди Дурдона Раҳимова.