Тошкентда такси ҳайдовчисини уриш ва унга туҳмат қилишда гумонланган эркак ва аёлга нисбатан жиноий иш очилди
Тошкентда такси ҳайдовчиси ва йўловчи аёл ўртасидаги жанжалдан сўнг аёлнинг укаси безорилик, аёлнинг ўзи эса туҳмат қилишда гумонланмоқда. Ҳар икки ҳолат бўйича жиноят ишлари қўзғатилиб, тергов олиб борилмоқда.
Ижтимоий тармоқларда такси ҳайдовчиси ва йўловчи аёл ўртасидаги жанжал акс этган
видеолар
тарқалди.
Такси ҳайдовчиси ёзиб олган видеоларга кўра, жанжал ҳайдовчи фарзанди ўриндиқни тинмай тепаверган йўловчи аёлга танбеҳ берганидан сўнг келиб чиққан. Сўнг ҳайдовчи аёлдан автомобилдан тушишни сўраган, бироқ йўловчи буни рад этиб, телефон орқали 2003-йилда туғилган блогер укасини чақирган.
Видеолардан бирида аёл танишлари келгач, ҳайдовчини унга жинсий яқинлик таклиф қилганликда айблагани акс этган. Шундан сўнг аёлнинг таниши ва ҳайдовчи ўртасида жанжал юзага келган.
Тармоқларда аввал аёлнинг танишлари олган видеолар эълон қилинган (кейин ўчириб юборилган). Унда муаллифлар ҳайдовчини аёлга шилқимлик қилишда айблаган. Бироздан сўнг эса ҳайдовчи машина салонида аёл билан суҳбати ва жанжал вақтида олинган видеоларни эълон қилди.
Ҳолат юзасидан пойтахт ИИББ
маълумот берди
. Унга кўра, ҳодиса 17-август куни Тошкент шаҳри Яшнобод туманидаги Абдулла Қодирий кўчасида содир бўлган.
Ҳолат юзасидан йўловчи аёлнинг укасига нисбатан Жиноят кодексининг 277-моддаси (Безорилик) билан жиноят иши қўзғатилган ва
қамоққа олинган
.
Шунингдек, такси ҳайдовчисига туҳмат қилишда гумонланаётган йўловчи аёлга нисбатан Жиноят кодексининг 139-моддаси 2-қисми (Интернет жаҳон ахборот тармоғида жойлаштириш орқали туҳмат қилиш) билан жиноят иши қўзғатилган. Тергов давом этмоқда.