Тошкентда мактаблар ва турар жой бинолари ҳовлиларида микроўрмонлар пайдо бўлади

Тошкентда мактаблар ва турар жой бинолари ҳовлиларида микроўрмонлар пайдо бўлади

Тошкентда турар жой бинолари орасида, мактаблар ва болалар боғчалари ёнида микроўрмонлар экиш бошланади, пойтахт туманларида эса салқин сайр кўчалари ва янги боғлар пайдо бўлади. Кочатларни экишнинг кузги мавсуми 10 ноябрда бошланади, бунда ҳар бир туман учун алоҳида кўкаламзорлаштириш дастури тайёрланади.

Ушбу чора-тадбирлар "Яшил макон" умуммиллий лойиҳаси доирасида Тошкент шаҳар ҳокимининг қарори билан мустаҳкамлаб қўйилди. Янги экишлардан ташқари, ҳужжатда дарахтларни парвариш қилишдаги ўзгаришлар, ариқ ва каналларни тозалаш, шунингдек, аҳолининг маҳаллаларни кўкаламзорлаштириш бўйича ташаббусларини қўллаб-қувватлаш ҳам назарда тутилган.

Толақонли боғ барпо этиш имкони бўлмаган кичик ҳудудларда микроўрмонлар яратиш йўналишлардан бирига айланади. Уларни кўп қаватли уйлар орасида, мактаб ва болалар боғчалари ҳовлиларида, шунингдек, бўш ер майдони чекланган маҳаллаларда жойлаштириш режалаштирилмоқда.

Микроўрмонлар учун 200 дан 1 000 квадрат метргача бўлган майдонлар ажратилади. Ҳар бир квадрат метрга камида иккитадан дарахт ва бута кўчатларини экиш кўзда тутилмоқда. Ер бетон ёки асфальт билан қопланган ва экиш учун майдон ажратишнинг имкони бўлмаган жойларда ўсимликлар катта тувак (вазон)ларга жойлаштирилади, ҳудуд эса кичик жамоат боғи шаклида безатилади.

Кузги экиш мавсумига тайёргарлик олдиндан бошланиши керак. Ишларнинг ўзи 2026 йил 10 ноябрда бошланади. Ушбу муддатгача тупроқни тайёрлаш, суғориш тизимларини тартибга келтириш ва бошқа агротехник тадбирларни бажариш зарур.

Бир вақтнинг ўзида пойтахтда ариқлар, коллекторлар ва каналларнинг ҳолати билан шуғулланилади. 1 октябрда бошланган икки ойлик тозалик кампанияси доирасида улар чиқиндилардан тозаланади, ҳудудларни мавсумий ёғингарчиликларга тайёрлаш учун алоҳида участкаларда таъмирлаш ишлари олиб борилади.

Ўзгаришлар аллақачон ўсаётган дарахтларни парвариш қилишга ҳам тааллуқли бўлади. Тошкентда компостлаш ва мульчалашни жорий этиш режалаштирилмоқда: майдаланган шохлар ва бошқа органик материаллар дарахтлар атрофидаги очиқ тупроқни парвариш қилиш учун ишлатилади.

Бундан ташқари, 2027 йил 1 январдан бошлаб "Яшил маҳалла" лойиҳаси доирасида "Маҳаллани кўкаламзорлаштириш" пакети ва "Яшил лот" тизимини жорий этиш назарда тутилган. Улар аҳолининг яшил ҳудудларни яратиш бўйича ташаббусларини қўллаб-қувватлаши ҳамда уларни кўчатларни экиш ва кейинчалик парвариш қилишга жалб этиши керак.

Янги яшил ҳудудлар ва ободонлаштириш ишлари айнан қаерда зарурлигини аниқлаш учун пойтахтнинг ҳар бир тумани бўйича алоҳида дастур тайёрланади. Буни 1 ноябргача бажариш керак. Дастурларда боғлар ва салқин сайр кўчаларини яратиш, сув тежовчи суғориш тизимларини ўрнатиш ва дарахтларни парвариш қилиш учун аниқ объектлар, муддатлар, молиялаштириш ва масъуллар кўрсатилади.

Эндиликда кўкаламзорлаштириш самарадорлигини экилган дарахтлар сони бўйича эмас, балки бир йил, уч йил ва беш йилдан кейин уларнинг сақланиб қолгани бўйича баҳолаш таклиф этилмоқда.